Vawiin Dt 30.7.2025 hian Dr Lalmalsawma Nghaka chuan Sairanga State Bamboo Mission hnuai a Horticulture Department, Bamboo Processing and Treatment Plants, etc Sairang ami chu a tlawh a, helai hmun an kalpui dan te a enfiah.
Dr Mala chuan, “Kan hriat theuh angin kan sawrkar hian May ni 14 khan Sairangah Bamboo Processing Plant hi cheng nuaih 252. 826 man a hawng a. He project ah hian mau atanga meihawl siam an tum bakah mau sawngbawl (seasoned) a kum 50 thleng a dahthat theiha siam an tum a ni.
“Sawrkar Press Release a an ziah dan chuan he project hian nitin meihawl ton 3 a siamchhuak thei dawn a, kum khatah ton 9000 vel siamchhuah an tum a, mau pawh nitin pum 670 vel a mamawh anga chhut a ni. Chu chu ZPM research base a ni em ka hre lova, DPR pawh kan nei lo, mahse sawrkar PR ah a inziah dan a ni. Research base a kal tura intiam ten he plant hi an hawn rualin an kalpui zawm thei lo nghal hi thil mak tak a ni.
“He meihawl siamna hmun sawrkarin a din hi a hmunah kan han tlawh a, an hawn lai vela hma an lak bak kha chhunzawm a awm ta miah lova, an meihawl siamchhuah lah hi a hnip em em a, a sawm nghal vek zel avangin helai Sairanga thingpui dawr te pawhin hmantlakah an ngai lo a ni.
“ZPM party hian an sawrkar hma khan an inzawrhna ber chu ‘Research base in kan kal ang’ tih a ni a, he an aupui research finding hi tun hi a hman hun tak a ni. He Bamboo project, vaibelchhe 2.52 man zet mai hi a lo thlawna hman loha awm tir ringawt hi research base an sawi thin nen a inhmeh lo hle.
“Chief Minister in kumin May thlaa Bamboo project hawnna a neihah khan a tawiawmtu Minister pakhat phei chuan mau sawngbawlna lamah Mizoram in bung thar a kai dawn tihialin a sawi a nih kha. Bungthar kaia hnekin tunah khar (shut down) a ni der tawh a. Mipui sum nuai zatel tehmeuh luanraltirin a awm hi vanduaithlak kan ti a ni.
“He project a sum an hman hi kan sawi tawh angin vaibelche 2.52 lai a ni a, heng te hi Sairang to Kawnpui kawng chhe zual lai siam nan khan lo hmang se tuna harsatna kawng chhiat em vanga kan tawh zozai hi kan tawk lo tur! Thal chhung zawng kha Mizoram PWD enkawlna hnuaiah a awm a. Ruahtui hul lai January thla atang khan Driver hovin kawng chhia an aupui tawh a, nawrh pawh an huaihawt chamchi a. June thla phei kha chuan Kolasib lama lirtheia eizawng pawl ten anmahni sum sengin an siam hial a nih kha. An ni ho bakah hian mimal thahnemngai Pu Vana te ang ten kawngpui chhia hi an aupui nasa a, kan sawrkar hian fur kan hmachhawn dawn tih hre reng chungin a ngaihthah lui tlat a, kan tuar ta a nih hi.
“NHIDCL hinan July ni 7 ah khulai kawng chhia khu Mizoram sawrkar kut atangin a la chauh a, NHDCIL kuta a awm veleh NLA leh Minister, Adviser to CM tih ten a siruk la in an zu vil leh lawi a, an kuta a awm laia ngaihthah em em tute khan mi kuta a awm veleh chhuanlam siam lova kawng siam mai turin thu te an zu pe vel a!
“He sawrkar hian kalphung thar an sawi nasa em em a, an kalphungthar sawi chu tunah hian a takin kan hmu a, kalphung awmze nei lo, lemchang sawrkar kan hrawn mek a ni.
“ZPM MLA leh Minister ten kawng chhe siam an tlawh te hi, Chief Mininister leh PWD Minister te lakah opposition role an play ang a ni a, ruling MLA leh Minister zingah oppostion an awm tihna a ni, heng te hi kalpung danglam tak a ni a, an party chhung boruak pawn lamah an lanchhuahtir mai a ni” a ti.
