MNF Party Adviser leh Cabinet Minister Pu Lalruatkima’n 21st October, 2023 a press conference a neih tum a an party manifesto 80 percent ti hlawhtling tawh ang a insawi chu Dr. Lalmalsawma Nghaka, MPCC Treasurer chuan vawiin khan thu belhchian dawllo leh mipui rilru hruai kawi tumna mai anih thu a sawi.
Dr. Lalmalsawma Nghaka chuan, “Kum 2018 inthlan dawn khan Social and Economic Development Program (SEDP) kha MNF hotute ka atangin kan hre tam hle anih kha. Anmahni tawngkam tak phei Mizoram-a chhungkua zawng zawng (NLUP dawng tawhte pawh huam vekin) chhung tinin cheng nuai thum an dawn tur thu kha an hotupa phei chuan a sawi nasa anih kha.
“Tun dinhmunah SEDP hi chhungkaw nuai khat leh singhnih in dawng tawh a chhut a ni a. First phase ah chhungkaw 60, 000 hnenah Rs. 50, 000 theuh pek anni tawh a. Heihi an tiam nuai 3 atanga chhut chuan 16 percent chauh an dawng tihna a ni
“Second phase ah chhungkaw 60, 000 hnenah Rs. 25, 000 theuhin first instalment an pe a. Heihi an tiamna nuai 3 atanga chhut chuan 8 percent vel an dawng ve hram anih chu! Third phase tur erawh membership drive leh campaign fund atana an hman tum kha chunglamin a remti lo aniang chu. MCC puan anih avangin an che thei ta lo a ni.
“MNF party hian thalaite tan tiin eizawnna kawng zawnpuina anih beiseiin, SEDP Board mak tak tak 14 an din thu kan hria a. Chutah chuan Vice-Chairman leh members atan thiam thil bik nei em em pawh nilo party mi duhsak zawng an in ruat teuh mai a. Board tin hman tur vehicle 2 theuh support staff nen pek an ni a. Hemi atan hian thlatin cheng nuai 37 hman ral niin kum khatah cheng nuai 444 khawral anga chhut a ni.
“Heng SEDP Board te hian eng hlawhtlinna nge an neih tih mipuite hian hriat an chak khawp mai. MNF party hian healthcare hnuaiah cheng nuai 2 theuh chhungkaw tin tan an tiam a. Rs. 63.88 crore chu reimbursement damlo enkawlna an la pe thei lova, an la bat sak mek a ni. He MNF Healthcare Scheme hi mipuiin inbumna mai nia an ngaih avangin kumin 2023-24 chhung hian enrolment ringawt pawh 32.75 % in a tlahniam duai mai a ni. Tunge mawhphur ang le he thilah hian, West Bengal sawrkar em ni kan mawhpuh ang?
“MNF sawrkar hian Rs. 1000 crore lai Asian Development Bank atangin damlote hospital bill rulhna tur hi puk an la tum mek chauh bawk a. Heng mipui tawrhna nasa tak, thenkhat phei chu kum 2 chuang te bill tang nghak tawhte hian healthcare-ah hian kan sawrkar hrawn mek hi hlawhtling an tih a rinawm lem loh a ni. Khawnge Rs. 150 crore lai SEDP atanga healthcare scheme atana an dah hran tawhte kha ?,” tiin a zawt bawk.
Dr. Lalmalsawma Nghaka chuan, “Kan CM hian Lengpui Airport chu siam thata India ramah pawh Airport cute ber pawla siam a tum thu kha a sawi a. Rs. 19.95 crores lai mai sengso a an sak that laiin a chim rup mai anih kha, hengte hi hlawhtinna kan la ti zel dawn em ni? Tunge Airport sak lai chim avang hian hrem an awm tawh em? Tute nge mawhphurtu tih hi mipuite hian an hre duh a ni.
“CM hian Aizawl chu ‘Traffic Jam Free City’ ah siam tumin kawngchhawng leh PAHOSS te an sawi thin a. Deputy CM press statement atanga a lan dan chuan parking spaces 11 chiah 403 zingah hawn a la ni a. Chumi awmzia chu 2.7 percent chiah heng beneficiary 403 zingah hian ati hlawhtling an awm tihna anih chu. Parking lot dang 392 te hi engtin nge ni zel dawn tih hi kan zawhna a ni.
“Contract leh supply chungchangah mumal zawk a kal an tum thu kha MNF Manifesto a langsar tak pakhat a ni bawk awm e. Kamrul leh Zoramchhana vulh chiam mai hi kan sawrkar hian helama an hmalakna langsar chu a ni ber awm e. Kamrul Laskar ringawt hian sawrkar atangin contracts Rs 11,643 crore a hmu nia hriat a ni a.
“KR Construction hi Lengpui Airport Renovatio thawh mek laia chim taah pawh contractor anih thu leh work order pawh chhuah hma thla ruk hmalam khan CMO atangin green signal hmuin hna alo thawk tan daih tawh tihte hriat a ni lehta zel a. Mipui sum Rs. 19.95 crores engtiang takin nge an suasam tih chu Zoram mipuite hmuh theihin a awm a ni. BJP chuan Delhi lamah Gautam Adani an nei a, MNF ve thung chuan Mizoramah Kamrul Laskar an nei ve thung.
“MNF sawrkar a langsar tak Minister Pu Robert Romawia chu office of profit thubuai te kha a awm bawk a. Party thenkhat phei chuan dan phalloh tiin Governor hnenah disqualify turin lehkha an thehlut hial anih kha. The NECS inrawlhna cheng 4.88 crore lai ho lam taka khawhralna Darlak to Sihthiang village road chungchang pawh mipuite hian an la hrereng a ni. Tin, hmanni lawkah Rs. 1,387.5 crores central atanga fund rawn kal hmangin restricted tenders 109 lai chu CM chan PWD department in ni 11 chhung lekin an passed fel tih kan hmuh bawk kha.
“Mizoram State Lokayukta Chairperson chuan hnathawk tak tak turin sawrkarin a thuam tha tawklo tih a sawi a. A hmingin Lokayukta chu ha nei sillovin an din ve thawr mai a. Hnathawhna hmanrua pe silova pawngpaw din tawp mai chuan awmzia a neih loh zia chu Airport Renovation chungchanga CM laka case thehluh serious tak pawh hmasawnna a awm hleitheilo reng a ni. Mizoram Lok Ayuta hian case pahnihah CBI ko lut turin a ti a, Mizoram sorkar in a ko lut duh lo a ni,” a ti.
MPCC Treasurer chuan, “CM buaipui em em mai mai mau chungchang chu a hlawhtling tawklo aniang chu, tumah hian an sawi tha peih tawh lova. Lengpui leh Hmunpui lama pilot an project an tihte khu engtiang taka hlawhtling nge tih video nen rawn tarlang thei se a duhawm viauin a rinawm. A nursery leh a chi supply kaihhnawih vela hlawhtling ta te chanchin pawh chiang zawka hriat hi mipuiin kan chak a ni
Heng a chunga sawi bakah hian thil dang tam tak ala awm a. Vawikhatah tarlan vek sen anih loh avangin a tahtawlin Mizoram mipuite hriatah kan rawn pholang thin dawn a. Heng vawiin a kan sawi atang ringawt pawh hian MNF sawrkar hi a hlawhtling tawk kan ti em? Hmala ve zuka a tawp thlenpui tak tak silo policy ang hi a tam zawk mah chu anih a rinawm a. Manifesto zawng zawng za a sawmriat kan tihlawhtling an tih hi eng chhutna nge an hman hman ang aw tih hi mipuite rilru a zawhna lian tak awm chu a ni.
“Chuvang chuan, Congress party chuan thiltih hlawhtlin theih miah loh tur tiam zut mai hi thalo a ti a. Kan sawrkar chuan kan thiltiamte hi uluk taka chhut sa leh budget implication tur pawh ngaihtuah lawk vek anih vangin keini chuan kan tihlawhtling ngei dawn a ni,” a ti bawk.
