Vawiin ni 12 March, 2024 Thawhlehni hian Rajya Sabha MP, Pu K.Vanlalvena chuan Rawpui Branch, YMA Golden Jubilee lawmnaah khuallian niin ahmanpui a, YMA Run building thar hawnna a nei bawk.
He huna khuallian Pu K.Vanlalvena MP chuan thusawiin, Rawpui khuain YMA Run concrete building, sorkar puihna tel miah lova building tha tak mai, a chhawng hial nei thei leh kum tam tak atang tawh a Library chang tlung tak mai an lo nei daih tawh chu fakawm atih thu a sawi.
Pu K.Vena chuan, YMA chu ram leh hnam humhalhtu ber pawl, tih te pawh hian sawi ila a dik viau awm e. YMA hi ram pum huapa pawl lian ber anih bakah, India ram angah pawh nise state dangah hetianga mi nawlpui tel theihna pawl hi an nei ve lem lo, hei hi a ni Mizote kan vanneihna em em chu, a ti.
Rajya Sabha MP chuan, tunlai kan thalai leh naupangte vanneih tawhzia thu sawiin, Mualcheng naupang ka nih angin pawl 3 thleng bak Mualcheng ah school ala awm si lo a, Mualcheng atangin Aizawl ah school kal angai, Aizawl kal turin ke in National Highway thleng kan kal thin. Ka nu leh pa te lo nei mi ve mai an ni, chutiang a thingtlang mi harsa tak chhungkua atang a chhuak mah ni ila, Pathian zarah MP kan nih ve chhung hian parliament session ah vawi 15 lai thu ka sawi ve reng tawh mai, a ti.
Pu K.Vanlalvena chuan, Pathianin Mizo te hi ram min pe a, he kan chenna Mizoram hi Pathianin hmun khat ah, ram khat ah min la hruai khawm ngei ang tih hi beisei ila, he kan ram leh hnam tan hian abik takin thalai leh zirlai zawng zawng ten kan ram neih chhun leh kan hnam tan hian theih tawp a tang zel turin rilru i siamthar zel ang u, a ti bawk.
Rawpui khuain YMA Run an sak hi Zopa chhiara chhawng hnih a ni a, Rawpui khua hi Hnahthial district a awm a ni. He hun ah hian Central YMA Financial Secy, Pu Ms-a Ralte chu khual zahawm niin, Hnahthial leh Lunglei YMA Sub.Hqrs. OB ten an tel pui bawk.
