Vawiin khan Mizoram Public Service Commission (MPSC) Chairman J.C. Ramthanga IAS(Retd) chu MPSC a thawh hun bi a lo tawp tak avangin superannuation pension in a chhuak a. Amah thlahna pualin MPSC Examination ah hun hman a ni a, K.Lalrinkima Addl. Secretary in a kaihruai a ni. MPSC Member te leh Officer staff te bakah Standing Counsel an tel a ni.
Amah thlahna hunah hian J.C Ramthanga chuan thu sawiin, kum 2 vel Chairman a nih chhunga MPSC hmasawnna leh hlawhtlinna – building tih changtlun te, Officer leh staff te service siam that leh, state dangte tihdan tha entawn chunga MPSC examination kalphung siam danglam ngaite tifel tura theihtawp a chhuahna ah Secretary leh officer te bakah staff ten nasa taka an tawiawmnaah lawmthu a sawi a. Heng hmasawnna hnathawh te hi lehkhabua siam a ni tih tarlangin a hun chhunga MPSC in hmasawnna a neih zawng zawngte chu officer leh staff te thahnemngaihna leh inpekna avanga awm thei a ni, a ti a. Thawhhona boruak tha chu lawmawm a tih thu a sawi a ni.
JC Ramthanga chuan MPSC chu India ram Danpui, Constitution a chuang, constitutional body a nih angin Chairman leh Member te ruat theih dan leh ban theih dan tur pawh tarlan vek a ni a. Criminal case avanga Supreme Court in thiamloh a chantir a bang tlaka a ngaih a, India President in a ban a nih ngawt loh chuan tumahin Chairman bang tura nawr chi a ni lo, a ti a. Tunhnaia MPSC in beihna a tawh ah thawktute tanrualna chu lawmawm a tih thu sawiin Chief Minister meuhvin press mite hma ah inquiry report ah MPSC dik lohna an hmuh loh thu leh report chu sawrkarin a pawm tih a sawi chu a lawmawm tak zet a ni, tiin MPSC zahawmna humhalh a, a zahawmna leh rintlakna vawng nung zel turin officer te leh staff te a fuih a ni.
Pu J.C.Ramthanga hi kum 1989 ah IAS a lut a. Manipur cadre niin Manipur state sawrkar hnuaiah kum 25 leh Mizoram state sawrkar hnuaiah kum 8 office pawimawh tak tak chelha a thawh hnuin a service a bahlahna awm lovin 31st May, 2022 khan Mizoram sawrkar atangin pension in a chhuak a. June 21, 2022 ah Chairman MPSC hna zawmin kum 2 a thawh chhung hian MPSC tih changtlunna tur sulhnu duhawm tak tak hnutchhiahin vawiin 6th May, 2024 hian a hna a lo chawlhsan ta a ni.
