May ni 21, 2022 Inrinni a Aizawl Bazarpuia chawhmeh zuar te thlai zawrh lai hralh tlak loh khawpa tuihawkin nasa taka a len darh sak chu Congress Thalai chuan pawi an tiin an lainat takzet tih an sawi.
Thuchhuah an siamah MPYCC chuan, “Aizawl Bazarpui a bazar building sakna tur Congress sorkar-in pawisa kan dah sa diam tawh, MNF sawrkarin a hun takah sa zo nise chuan hetiang hian mangang takin bazar nuho bakah, kut hnathawktute an awm lo tur a nih laiin, hetiang dinhmuna mipui min siamtu MNF sawrkar hi Congress thalai chuan demawm kan ti tak zet a ni.
“Phaizawla awm Assam state ten tui lian an tawrh rual a, keini tlangrama chengten tui lian kan tawng ve ta mai hi MNF sorkar leh Aizawl khawpui enkawltu, Aizawl Municipal Corporation MNF kaihhruai sorkar kan hrawn mek te hi, tuk khat ruah sur mai maia bazar leh a chhehvel enkawl kawnga an demawmzia a lang chiang hle a ni. Ṭawngkam thiamna hmanga in sawifiah leh sawimawi tum lo a, Mizoram chu sawi loh Aizawl khawpui pawh enkawl zo lo an nih zia in hre chiang a, zahna chang hria a, insiamṭhatna atana hmang turin Congress Ṭhalai chuan kan chah nawn mawlh mawlh bawk a ni,” an ti
MPYCC chuan, “RTI zawhna chhannain a tarlan danin, Aizawl New Market sak that hna kal mek hi Aizawl City Centre Annexe tih a ni a. Contractor chu Lushai Engineering Private ltd. Ramhlun, Aizawl te an ni. Building sak thar hna hi October ni 4, 2018-a tan niin, thla 36 (kum 3) chhunga zo tura tih an ni bawk. Tunah hian hna hi Za-a 35 zawh tawh a ni a. New Market sak that hian chhungkaw 2000 chuang eizawnna a nghawng mek a. A sakna tur hian sum hi Cheng Nuai 3641.59 ruahman niin, Congress Sawrkarin Bazarpuia eizawngtute hmakhua a ngaih avangin NEDP aṭangin a sakna tur hi dah a ni a. Sum hi a vaiin K. Deposit a dah daih a ni a, a lak chhuah leh hi MNF sawrkar sumpai thiam loh vangin a harsa a, hnain a tawrh phah ta niin a lang. Hetihlai hian MNF sorkar hian a duhnaah chuan sorkar kalphung pel pawhin sum tamtak hman huau huau a ching a ni tih hi Zoram mipuiten kan hai lo a. Mizoram khawpui mamawh hmasa, uluk leh ngun taka ngaihtuah a, hmala ṭhin turin MNF sawrkar hi Congress Thalai chuan kan chah nawn leh a ni,” an ti bawk.
