Vawiin December ni 14,2022 (Nilaini) khan Congress Ṭhalai Hqrs (MPYCC) chuan an President Dr. Lalmalsawma Nghaka official Facebook Page chu mi tuten emaw an hack sak avangin Cyber Crime-ah FIR an thehlut.
MPYCC President Dr. Lalmalsawma Nghaka facebook page hi November thla tantir khan hack sak niin, a control hloh a ni a. Thawhtan zan atang khan he page atang hian thlalak leh thu hrang hrang hacker te hian post na siam a. Facebook hmunpui lamah report nimahse vawiin thleng khan hack tute hian post na la siam zel a ni.
Congress Thalai chuan, “Dr. Lalmalsawma facebook page hi follower pawh 13,463 zet an awm hman a, bluetick pek niin Mizoram thalai leh nu leh pa tlawh hlawh ber pawl ni a. Hetianga tangkai taka Congress thalai President facebook page hman a nih laia hetianga hack sak a ni hi Congress thalai chuan pawi a ti takzet a. He page khawihtute hian an duh duh post an siam avang hian Politics thila inbeihna leh intihhmingchhiat theihna a nih avangin he page atanga post siam reng reng amah Dr. Lalmalsawma tih a ni lo tih lo hre turin Mizoram mipuite kan ngen a ni,” an ti.
