March ni 29,2023 nilaini a Lunglei Municipal Council(LMC) Inthlan vawikhatna lo awm turah, Congress Ṭhalai Hqrs.(MPYCC) chuan LMC Ward tin mipuite, Lunglei khawpui hmasawn nan Congress Official Candidate te lo vote pui turin an ngen.
MPYCC chuan, “Pathian leh Lunglei mipui zara LMC Inthlana hlawhtlinna chang a, Congress Party sawrkar siamtu kan nih hlauh chuan Lunglei Municipal Council sawrkar ṭha, Lunglei hmasawnna thlentu leh mipui phurrit siamtu ni lo, chhawk zangkhai tur kan siam dawn tih Lunglei mipuite kan tiam a ni.
“Inthlan boruak vuakvet leh inthlan dawn hnaihah sum hmangin, a rukin vote lei tumin mi ṭhenkhat chu an hmanhlel leh dawn a, heng thil ṭha lo te hi hnawl ngam tur leh heng laka inveng a, fimkhur taka mahni chhia leh ṭha hriatna hmanga Lunglei khawpui hmasawnna atana ward tin aiawh thlang turin Lunglei mipuite kan ngenin duhsakna kan hlan cheu a ni,” an ti.
