Vawiin May ni 21.2024 (Thawhlehni) khan Mizoram Pradesh Youth Congress Committee chuan MPYCC roomah India Prime Minister chhuanawm leh Congress hruaitu Tamil hel ho kuta boral ta Pu Rajiv Gandhi hriatrengna hun hman a ni.
He hunah hian MPYCC President Pu Laltawnliana chuan, Pu Rajiv Gandhi kha Mizoram Peace Accord ziahna tura mi tangkai a ni a, khatih hunlaia sorkar laipuia mi tam zawkin ‘helna in lukhawng a nei tur a ni lo’ tih ngaihdan nghet tak an neih lai pawha remna tluantling siam duhtu a ni a, Mizoramin remna kawng chak takin a zawh theih phah a ni, a ti.
Pu Laltawnliana chuan, Mizoram Peace Accord ziah a nih hnua a lawm tura chhungkuaa lo zin khan khatih laia Chief Minister Pu Hawla hovin Mizoram dung leh vang an fang a, Pu Rajiv Gandhi pawhin, Mizo hnam nunphung, hnam tha leh thalo inthliarna awm lo, in unauna leh inpumkhatna tha taka vawng tu kan nihna a hmuhin Mizo hnam a ngaisang a, India ram hmun dangte pawhin entawn thei hial se a duh thu a sawi a ni.
Kum 1987 a Mizoram a tlawh tuma Pu Rajiv Gandhi chuan Mizote min fuihna thu pawh a dik zia kan hmu chho zel tih sawiin Pu Laltawnliana chuan, “Sum leh pai leh khawvel thila hlawkna umin Mizo hnam nunze mawi hi in hralh tur a ni lo. Pakhat hralha, a dang in lei a nih chuan hmasawnna khingbai a ni a. Hmasawna tluantling erawh chuan mihring mamawh sum leh pai leh thil dangte bakah rilru, taksa leh hnam nunphung engkima hmasawnna a huapzo vek a ni, a ti tih sawiin duhamna avanga kan Society nasa sawi nghin a ni ta mek leh kan sakhua leh kan hnam himna ngai pawimawh lo sorkar neih pawizia hi kan hmu chho mek a ni, a ti.
Pu Laltawnliana chuan, Rajiv Gandhi thih cham, May 21 hi National Anti-Terrorism Day ah hman thin niin urhsun takin sorkar hnathawk te’n Inhlan Tharna Thutiam (Pledge) sawi ṭhin a ni a. BJP sorkar hnuah rawlrala chetna dodalna ni hian ngaih pawimawh a hlawh zo ta loa, tunhma zawng aia firfiaka chetna (Terrorism) a thleng nasa chungin Central BJP leh Mizoramah pawh tualṭo party BJP thawhpui te pawhin engahmah an ngai loa, ram mipui kan him lo zual hle a ni. Kan hnam, kan sakhua a him loh chuan hmasawnna tluantling a awm thei loa, Congress chu kan hnam, kan sakhua humhim duhtu kan nih avangin theihtawpin kan ram, kan hnam, kan sakhua himnan hma a la zel dawn a ni, a ti bawk.
He hun hi MPYCC Senior Vice President Pu Ngurdingpuia Pachuau in a kaihruai a, Pu Rajiv Gandhi-a’n ram tana a hnathawh leh Mizoramin remna leh muanna kan neih dan chanchin ngaihnawm tak a sawi bawk.
Pu Rajiv Gandhi, Congress hruaitu leh India Prime Minister ngaihven hlawh ber zinga mi hi liberation of Tamil Tiger Eelam (LTTE) te’n thihchilh bomb hmangin May ni 21.1991 khan Sriperumbudur, Tamil Nadu-ah kum 46 mi chauh niin a that a. Hemi tum hian a hmunah mi 14 an boral a, mi 43 in hliam na tak an tuar bawk a ni.
