Tukin June ni 24, Inrinni zing khan MPCC Campaign Committee kaihruaina hnuaia ruahmannaa kalpui mek, Aizawl Chanmari Bazar bulah MPYCC)Congress Ṭhalaite Hqrs) te chuan a thawh thumna atan, *Ṭhat loh theih lohna sawrkar ṭha, kalphung dik siam tura hmalakna beihpui* street campaign an nei a.
He hun hi Pu Lalsanglura Sailo, Vice President,MPYCC in hneh taka kaihruaiin, programme te Pathian hnena hlanna Nl.Malsawmdawngkimi, Vice President,Aizawl North-III Youth Block Congress Committee in a nei a ni.
He huna thusawitu Pu Hriata Chhangte chuan, “Sakhaw zalenna mausam a India ram Hindu lal rama siam tum ngar ngartu party, BJP paihthla thei tura India mipuite beisei ber, Congress Party hi mizo Kristiante hian kan support ngei ngei a ngai a ni. BJP sangawizawnpuia thawhpuitu leh BJP thawhpui hnial lo Pu Lalduhawma leh a kaihruai ZPM party hi sirah kan hnawl a ṭul takzet a ni. Kan ram, kan hnam leh kan sakhua a him theihnan mipuite i ṭhangharh ang u”, a ti.
Pu Rosiamngheta,AMC Corporator chuan, “Mizoram Party lian leader pathum zinga kut fai ber, sawrkar enkawl tura arkhawthim dai lo tur, mi dik leh rinawm, nachang hria kan nei a, Zoram sawrkar kalphung dik lo laite siam ṭha a, hmasawnna min thlenpui tur congress party lo chu an awm lo kan tih a ngai a ni,” a ti bawk.
“Tin, BJP in Sakhaw zalenna palzutin, kristiante min nekchep a, North East India ah Mizoram chiah kan la him hram hram a. BJP paihthla thei awmchhun party lian congress hi Mizo mipuiten kan support a ngai a, chu chu kan ram leh hnam himna a ni”, a ti.
Pu Lalrindika Hachhek bialtu MLA pawhin thusawiin, “Pathianin kan tan liau liau a min pek, Mizoram hi a chhunga mipuite hian kan tichhe tur a ni lo a, a ṭhatna turin theihtawp chhuaha kan beih bakah humhim tlat hi mitin mawhphurhna a ni. Chumi tur chuan mipuite pawhin kan theihtawp kan chhuah a, Sawrkar ṭha siam thei tura Party belh tlak, hruaitu dik leh rinawm, sawrkar ṭha siam tura a kalphung dik leh dik lo lai hrechiangtu Pu Lalsawta leh a kaihhruai Congress party hi kan tihtlin a ngai a ni”, a ti bawk.
Congress party tunhnaia zawmthar, Pu Lalnunmawia Chuaungo IAS(Rtd), Chief Secretary hlui pawhin thusawiin, “Pu Sawta mi dik leh rinawm, sawrkar hnathawhna lama ka mi hriat chian em em leh ngaihsan, thil ti mai mai lova theihtawp chhuah ṭhin, thil ṭha duh bawk si anih avangin ka ring tawk a, ram siamṭhatna leh sawrkar kalphung dik siam tura hmalakna tura thawhho puiah ka duh em avangin congress party ah ka lo lut a ni”, a ti bawk.
Dr.Lalmalsawma Nghaka, Treasurer,MPCC pawhin thusawiin, “Congress sawrkar kal ta khan thilṭha tam tak a ti a, hmun tin ram tinah hmasawnna nasa takin a thlen a ni. Chutihrualin, tihfuh tawk lo leh ṭha lo lai a awm tih erawh hai rual a ni lo. Pu Lalsawta hovin Pathian ṭihna nen tihfuh tawk loh te chhui letin, a ṭha lo lai siam ṭha a, a ṭha thei ang bera ram leh hnamin hma a sawnna tura theihtawp chhuah hi Congress party tum ber a ni a. Ṭangpuihna hmanga thawkrim leh mi taimate dinchhuahna ramah zoram hi siam a, mipui huapzo sawrkar, mi nawlpui tana innghahna leh thlamuanpui tham sawrkar ṭha leh kalphung dik kan siam dawn a ni” a ti bawk.
Hun tawp kharna leh Pathian hnena lawmthusawina Pi Lalthlamuani, Chanmari Local Council Member in neiin, programme tih tawp a ni.
MPYCC te hian tunhnaiah Aizawl veng bazar lunlaiah Street Campaign nei ṭhinin, MLA General Election awm hma chu a khat tawk a neih reng an tum a a ni. Tukina Street Campaign-ah hian MPYCC President Pu Laltawnliana leh a thawhpui te leh party hruaitu hrang hrang te an fuankhawm ṭha hle a. Chanmari bazar leh a chhehvel ami ten he Street campaign hi an hlut thiam hle a ni.
