Mizoram State Commission for Protection of Child Rights (MSCPCR) Chairperson Jimmy Laltlanmawia chuan vawiin khan a office-ah chanchinthar lakhawmtute kawmin, “Tunhnaia naupang kumtlinglo khawihchhiaa, midang hmuh theih tura hursualna video bawlhhlawh siam na’na naupang inhnamhnawihtir tu leh pho lang tu Lalrampana chu CBI ten June ni 9, 2025 khan an rawn man a. Kan ram chhunga hursualna leh a kaihhnawih naupang chunga a thleng leh thin hi Commission chuan pawi a tiin a ngaimawh takzet a ni,” a ti.
Jimmy Laltlanmawia chuan, “The Protection of Children from Sexual Offences (POCSO) Act, 2012 Section 13, 14 & 15 chuan hursualna leh zahmawh rawngkai video leh thlalaka naupang inhnamhnawih tir leh tel tir emaw, hman tangkai emaw, entir leh hmuhtir emaw pawh a thiang lovin a khap tlat a. Chumi piah lamah, naupang laka hursualna leh zahmawh rawngkai lanna thlalak leh video reng reng, mimal kawlthat tur a ni emaw, midang hmuha pho lan tur a ni emaw pawh lo neih leh lo kawl pawh a khap tlat a ni. He Dan bawhchhetu chu kum-5 aia tlem lo Lung-In tan tir leh sum chawitir thlengin a huam a, a tisual nawn tu chu kum-7 thleng tang tura hrem theih a ni bawk.
“Tin, Information Technology (IT) Act, 2000 Section 67 B chuan – (a) mi tupawh naupang hursualna leh a kaihhnawiha an lanna emaw, naupang inhnamhnawihna emaw, naupang zahmawh leh saruaka an lanna emaw reng reng electronic media hmanga thehdarh leh thehdarhtir tu leh (b) naupang saruaka a awmlai thlalak/video, mipat hmeichhiatna leh hursualna kaihhnawiha an lanna thlalak/video te siam chhuah emaw, lak khawm emaw, internet-a zawn (browse) emaw, download emaw, fak mawi emaw, in thawn darh leh sem kual emaw (c) online hmanga hursualna lam hawi leh zahmawh rawngkaia naupang thlem, vau te leh (d) naupang, mipat hmeichhiatna an hmanglai leh an inhritla lai emaw, naupang pawngsual anih lai leh naupang chunga hursualna thleng lai lanna thlalak/video lo sîam (record) tu chu kum-5 aia tlem lo Lung-In tan tir leh ` 10,00,000 (Cheng nuai sawm) chawitir thlengin a huam a, a tisual nawn tu chu kum-7 thleng tâng tura hrem leh 10,00,000 (Cheng nuai sawm) chawitir theih a ni bawk.
“Commission chuan heng Dan bawhchhiatna hi kan ram chhungah thleng tawh lo se a ti a. Tun hnaia naupang khawih chhetu Lalrampana leh midang hetianga inhnamhawih te hian an phû tawk hremna hmu ngei se a duh a ni,” a ti bawk.
