Aizawl: Mizoram Pradesh Congress Committee chuan Chief Minister leh Health Minister ten Mizoram State Health Care Scheme an ngaihthah em avangin dam lo bill ba, cheng nuai 7100 (vaibelchhe 71) chuang a awm phah a ni, an ti. Nimin khan Aizawl Press Club ah chanchinbumite kawmin MPCC thupuangtu Dr. Lallianchhunga chuan, “Congress sawrkar lai khan mi rethei zawkte pawhin Health Care kha a takin an chhawr tangkai a, tuna MNF sawrkar hnuaia harsatna lian tham an tawh ang hi a awm ve lo a ni,” a ti.
Congress party kaihhruai hmalakna sawiin, “March 30,2010 atangin Corpus Fund (sum bawmpui) tha tak siamin, Asian Development Bank (ADB) atanga sum hmuh cheng vaibelchhe 117.80 leh a tira Mizoram State Health Care Scheme (MSHCS) atana an dah cheng vaibelchhe 50 atanga an hman bang, a vaiin cheng vaibelchhe 149.6 in bul tan that leh a ni a, heta pawisa pung atangin dam lo bill ba pek thin a ni,” a ti bawk.
MPCC thupuangtu chuan tunhnaiah Chief Minister in Congress sawrkar in MSHCS ah sum an dah lo nia a sawi chu thu diklo a ni tiin, “Mi thahnemngai ten RTI hmanga zawhna an siam, Finance department in an chhanna ah kum 2018-19 chhungin CSS leh State sum atangin Health care atan hian nuai 539.46 an dah tih an sawi a ni,” a ti bawk. Congress thupuangtu chuan, “MNF sawrkar lai hian Health Care Scheme-ah harsatna a thleng ziah a. Kum 2008 Sept 26-ah pawh MNF sawrkar hnuaia dam lo bill peka harsatna awm chungchang chu langsar takin chanchinbu te pawhin an chhuah hial a. Congress Ministrý in Mizoram State Health Care Scheme (MSHCS) a siam that hnuah dam lo te’n bill lakah harsatna lian tham an tawk ngai lo va. Mahse, kum 3 awrh MNF a sawrkar chhungin dam lo bill pek theih loh cheng nuai 7100 chuang a tling khawm hman a ni,” tiin Pathian zarah Congress party an sawrkar chuan a hma ang bawkin a hun takah bill hi an pe leh dawn niin a sawi bawk.
Mizoram sawrkarin MHSCS atan ADB loan loan puk a tum chungchang ah MPCC thupuangtu chuan Mizoram leiba a pun dawn avangin tha lo a tih thu sawiin mipui phurrit siam lo zawnga chinfel theih dan a awm nia an hriat thu a sawi bawk.
