Mizoram State Sports Council (MSSC) kum 50-na Golden Jubilee lawmna kum khat chhung awh tur hawnna inkhawm chu vawiin khan Vaivakawn Cultural Centre & Auditorium-ah neih a ni a, MSSC President hmasa ber, Dr. H. Thansanga, ex-minister chuan khuallian niin Golden Jubilee lawmna hi a hawng a ni.
Golden Jubilee lawmna Inkhawmah hian khuallian Dr. H. Thansanga chuan kum 1976-a MSSC a din tan tirha hma an lak dan leh din tura harsatna tam tak an paltlang dan te sawiin, kum 50 hmel a hmu ta chu ropui a tih thu leh lawmawm a tih thu a sawi a, hetih hun chhung zawnga MSSC hruaitute inpekna ropui a tih thu a sawi bawk. MSSC chu ram buai laia Mizo thalaite nun sahawk leh kal ngaihna hre lote an awm awl mai mai loh a, awmze nei a an nunphung her rem a nih beiseia din a nih thu sawiin hun lo kal zelah huang zauh a ni zel ta chu hmasawnna ropui tak a ni a ti a. Infiammite chu rilru fim leh thianghlim pu a, taimakna leh tawrhchhelna nei tura fuihin, India ram mai bakah khawvel huapa zofate tihmingtha tura theihtawp chhuahzel turin a fuih a, Sports Minister-in Olympic-a mizo thalaite an tel ngei theihna tura ruahmanna tha tak a siam chu lawmawm a tih thu sawiin, theihtawp chhuaha thlawp tlat turin Zoram mipuite a sawm a ni.
Inlawmna thu sawitu Sports & Youth Services Minister Pu Lalnghinglova Hmar pawhin MSSC in kum 50 hmel a hmu ta chu ropui a tih thu sawiin hruaitu hmasate leh MSSC a thawktute chungah lawmthu a sawi a, tun dinhmuna Mizoramin Sports-a a thlen chin chu a lawmawm rualin hmasawn belhna tur kan la ngah hle a ni a ti a. Kalphung tha zawk leh felfai zawk a awm theihna theihtawp an chhuah thu sawiin thurawn pawh an lak theih reng thu a sawi. Mizoram leilungfate zingah Olympian pahnih chauh kan la awm chu tlawmngaihthlak a tih thu sawiin India ramin kum 2036-ah Olympic thlen a tum a, hemi hun a lo thlen hi chuan Mizo thalaite thahnem tak India ram aiawha an tel theihna turin hmathlir mumal tak nen hma an lak mek thu a sawi bawk a ni.
Mizoram State Sports Council (MSSC) hi April ni 20, 1976 khan Executive Order hmanga din a ni a, The Mizoram State Sports Council Act, 2002 hmangin inrelbawlna leh kalphung mumal zawka tihchangtlun a ni. Tun dinhmunah MSSC hnuaiah hian State level Sports Association 34 an inziaklut a, Jubilee pual hian kum khat chhungin Sports Association tin hian Mizoram pum huap tournament pakhat theuh an buatsaih dawn a, hemi atan hian calendar mumal tak siam a ni tawh a ni.
MSSC Golden Jubilee pual hian tukin khan Golden Jubilee Torch (meichher) Relay neih a ni a, Bawngkawn atanga tanin Sports Association 34 aiawh ten Aizawl khawpui chhungah meichher inpe chhawngin, Sports Minister Pu Lalnghinglova Hmar, MFA President ni bawk chuan Aizawl Tennis Court ah a tlan luh pui a, inkhawm tawite neih zui a ni.
Golden Jubilee meichher hi vawiina Golden jubilee lawmna inkhawmah hian tlan luhpui niin MSSC President, Sports Minister ni bawk Pu lalnghinglova Hmar chuan khuallian Dr. H. Thansanga hnenah a hlan chhawnga, ani hian meichher dahna tur bik ruahmanah a phun a ni. Golden Jubilee meichher hi kum tluanin Sports Association hrang hrangten Golden Jubilee pual tournament an buatsaihah tar chhuah thin a ni ang.
Golden Jubilee puala T-Shrit siam pawh khuallian leh Sports minister te hian an tlangzarh nghal a, hemi pual Souvenir “Nghilhloh Bu” rotling tur pawh buatsaih tum a ni.
Vawiin Golden Jubilee hawnna Inkhawmah hian Pu Henry C. Lalrawnkima, Secretary, MSSC-in report a pe a, Dr. Lalhmuchhuaka, Vice-President, MSSC-in lawmthu sawina in a khar a ni.
