Mizo Students Union General Headquarters chuan vawiin ni 29, May, 2023 khan HSSLC Examination 2023 result a Stream pathum (Arts, Commerce, Science) a Mizo top 3 te lawmpuina leh MSU Special Award hlanna hun chu Cultural Centre Cum Auditorium, Vaivakawnah lawmpuina hun a nei a, K.Lalrinliana, Hon’ble Minister chuan khuallian niin a hmanpui a, Khualzahawm ah K.Laldawngliana niin John Lalpeka, Proprietor 3:16 Plan Solution chu Uaptu a ni. Program hi Vice President Laldinsanga’n a kaihruai a, Zo Career Solutions leh LEDSE Department atangin zirlaite fuihna thu ngaihthlak a ni bawk.
Khuallian K.Lalrinliana chuan ‘ Vawiin ni a zirlai kan lawmpuite leh program hmang tura lokalte hi in vannei takzet a, tunlai thiamna hrang hrang leh material kimchang tak hmangin lehkha inzirthei a, sangtak thlengturin duhsakna ka hlan che u a. Tuna zirlai kan lawmpuite hian Mizoram tan enge ka tih theih ang ti in lehkha zir sauh sauh turin ka chah che u a ni.’ a ti a. Pu Rintea chuan Pathian in Zofate tan hun a ruat a, tuna kan tawrhna hi inpawhna tha lehzual leh Zofate inpumkhatna a kawk a, hmun hrang hrang a chengte unau kan nihzia alang a, hnam movement hi kan ngaihtuah reng a ngai a, ngaihtuahna fimtak kan hman reng angai a ni tiin zirlaite a chah a. Khualzahawm Pu K.Laldawngliana chuan zirlai lawmpuite chu an inbultanna a ni tih hrereng a, chhawrtlak ni tura lehkha zir tura chahin zirlaite chu an tuma chiang tur leh Pathian tihna nen zonunzemawi chhawm nung zel turin a fuih bawk. Uaptu Pu John Lalpeka pawhin zirlai leh kalkhawmte chahin Kum 30 tlin hma a kan nih tur lam hawia kal a hun tawh zia uar takin a sawi a, nu leh pa te pawh an fate chu ring ngam a hmalam an panna ah tawiawm turin a chah bawk. Awlsam taka sum lakluh hian retheihna a thlen thin a, fate aia rohlu an awmlo a ti bawk.
MSU President Samuel Zoramthanpuia chuan ‘MSU hmalakna ah 80% hi zirlaite tan kan insawr bing a, 20% hi ram leh hnam in min mamawhna apiangah kan hmang thin a. MSU in zirlaite leh Ram tana kan thawhna kawng hrang hrangah zirlaite tan hnemhnanna a awm ta zel hi sawrkar leh mi inphalte zar a nih avangin lawmthu kan sawi duh a ni.’ a ti a. MSU hmalakna hrang hrang Project Mizoram 2nd Container hmanga a thlawna Mizoram damdawiin hmun hrang hranga bungrua sem theihna, MSU Cup kaltlanga infiam mite tana Assam Rifle tan theihna te, DCA class hawn thar tur leh MSU CSR hmanga Kawnpui College a Smart class siamna turte, Project Kulva hmanga International leh Interstate atanga Zofate inpui rawn beltute chhawmdawlna turte chu President chuan a puang bawk.
HSSLC a Mizo zirlai lawmpuina pek te chu :
ARTS:
1. Rodinpuia Ralte, Home Mission School.
2. Lalawmpuii, Synod Higher Secondary School.
3. Zomuanpuii, St Joseph Higher Secondary School.
SCIENCE:
1. Jonathan Lalhruaitluanga, St Joseph Higher Secondary School.
2. Lalnunmawia, St Joseph higher Secondary School.
3. Lydia Chingbiaki, Synod Higher Secondary School.
3. Kenneth Remlalfaka, St Joseph Higher Secondary School
COMMERCE:
1. Vanlaldika, St Paul’s Higher Secondary School.
3. Vanlalchhanchhuaha, Oikos Higher Secondary School.
3. H.Lalrintluanga, St Joseph Higher Secondary School.
3. Lalrinsanga, St Joseph Higher Secondary School.
4. PC Lianthangpuii, Oikos Higher Secondary School.
4. C.Lalnghenchhana, St Joseph Higher Secondary School.
MSU Special Award hi 60% disability ni chunga First a pass H. Lalchhuanawma, Bethlehem Vengthlang High School hnenah pek a ni bawk. Lawmpuina ah hian thuziak bakah Lalhruaitluanga, Managing Director ZoCareer leh RK Hnuna, Adviser MSU General Headquarters te lehkhabu ziah Zirna Lamtluang (Road Map to Higher Education) leh Mizo Competitive Year Review 2023 te hlan a ni.
