Mizo Students’ Union (MSU) General Headquarters, Aizawl chuan Kolasib district chhung Kawnpui khawtlang enkawl, Kawnpui College-ah zirlai ten changkang deuh zawka an zirlai an zir theih nan, CSR kaltlangin leh NTPC puihna hmangin Smart Classroom a dah dawn a, ni 7 June, 2023 hian Bongaigaon, Assam NTPC Office ah ah MSU leh NTPC chuan MoU an sign a ni.
MSU General Headquarters, Aizawl aiawhin Vice President Laldinsanga chuan a sign a, NTPC aiawhin Shashi Shekhar Addl. General Manager (HR), NTPC Bongaigaon, Assam chuan a sign bawk.
Kawnpui College hi kum 2018 atanga din niin, kum 2020 khan MZU Affiliation a lo ni tawh a, tunah hian Subject Department paruk English, Mizo, Education, Pol. Sc, Public Administration, History awmin, zirtirtu (teaching faculty) 12 an awm mek bawk a. Kawnpui College hi Tuirial bial chhung khaw hrang hrang zirlai te tan pan awlsam niin an bawh mek zel a ni.
MSU chu zirlai, ram leh hnam tan ding, Mizo zirlai te’n dinhmun sang ber an chan theih nana ding a nih angin NTPC hotute chuan MSU kaltlanga Kawnpui College a Smart Classroom dah a nih turah lawmawm an ti a, he inremnaah hian Kawnpui College a Smart Class room siamna turah hian NTPC chuan cheng nuai 3,80,314 a tum dawn a ni.
MSU Vice President Pu Dinsanga chuan, NTPC hotute hnenah Mizorama khawtlang enkawl zirna in a tam thu sawiin, zirna hmasawn nan CSR kaltlanga project siam tur tam tak a awm thu a sawi a, theihtawp chhuahpui chhunzawm zel turin MSU Vice President chuan a ngen. NTPC, Bongaigaon AGM, Shashi Shekhar chuan project dang siam a, thehlut leh thuai turin a chah a, project dang a hlawhtlin leh nan NTPC Bongaigaon, Assam atang pawhin theihtawp an lo chhuah tur an sawi.
