MSU Meidum Branch-in Sorkar an dem takzet tih an sawi

Mizo Students’ Union, Meidum Branch chuan Govt. Primary School Meidum zirtirtu indaih loh em em laia, tun hnaia zirtirtu regular VL Chhuanawma sawn chhuahsak an ni chu hriatthiam har an tih thu sawiin, “Sawrkar kan dem takzet a ni,” an ti.
MSU chuan, “Govt. Primary School Meidum ah hian zirlai 85 awm mekin, regular teacher pakhat leh MR teacher pahnih chauh an awm mek a, zirtirtute an indaih lo hle a. Chutihlaiin, VL Chhuanawma an sawn na hmun Govt. Primary School 3 Venglai, Kolasib ah hian zirtirtu pasarih (7) awm sa an nei a (Headmaster, Regular teachers-4, MR-2), zirlai 32 chauh an nei a, an indaih hle. Tin, Vl Chhuamaw hian Govt. Primary School Meidum atanga Govt. P/S -III, Venglai Kolasib transfer order Govt. P/S Meidum Headmaster/School copy tura Director Office atanga lehkha lo kal hi hup bo tlatin School ah transfer order copy a dah duh lova, MSU Meidum Branch chuan Meidum khawtlang zah lohnaah a ngai a, kan dem takzet bawk a ni.
“Govt. Meidum School ah hian hun eng emaw chen atang khan Headmaster pawh nei lovin kan awm a, Headmaster tur pawh kan dil mek laia, tuna kan zirtirtu neih tlemte zinga awmsa kan neih chhun pawh min sawn chhuahsak duh hi hriatthiam har kan ti hle a ni,” an ti a. “Zirlai leh zirnain nasa takin a nghawng thei tih hria a tuna VL Chhuanawma transfer order hi cancel turin sawrkar kan ngen a, ni 20 June, 2022 ral hma ngeia transfer order cancel lo emaw a aiawh regular teacher min dahsak nghal lo a nih chuan MSU Meidum Branch chuan na zawkin hma a la ang,” an ti bawk.