Vawiin khan Larsap Hari Babu Kambhampati leh Mara thalai pawl lian ber, MARA THYUTLIA PY (MTP) hruaitute chu Raj Bhavan-ah an in kawm a. He hunah hian MTP hruaitute chuan Siaha District huam chhunga mipui tana thil an ngaihpawimawh hrang hrangte bakah Refugee chungchang te leh NHIDCL company hnathawh hrang hrangte an sawipui a ni.
Larsap Hari Babu Kambhampati chuan MTP hruaitute chu lo lawmin an rawn kal chhan te, an mamawh leh an harsatna te a zawt a. An thil thlen te pawh uluk taka lo zirchian a tum thu te leh a tul anga bawhzui a nih tur thu te a sawi a ni.
He inkawmna ah hian N. Solomon, Asst. General Secretary. MTP Gen. HQ, Siaha leh a thawhpui te chuan Governor hnenah Refugee ten harsatna an tawhte an sawi a. Raltlan mangang tak te chuan Assam Rifle sipai duty te laka harsatna an tawk fo thin chu pawi an tih thu sawiin, hei hi tihtawp a nih theih nan hma lak sak turin Larsap chu an ngen a ni.
Siaha District a National Highway lamlian sial mek NHIDCL leh BIPL company te hnathawh chu MTP Gen HQ, Siaha vigilance & monitoring Cell ten’a a enpuina kawnga an duhthu a sam tawk lohna thute Larsap hrilhin furpui thlen hma ngeia mipui nawlpui tana harsatana a thlen loh nan a kawng nawlpui zawh anih theihnan Larsap hi hmalakpui turin an ngen a ni. Cellular Service provider chungchang pawh he hunah hian sawi a ni a. Hmun kilkhawr zawk a nih avanga Service provider ten’a service an pek that loh zia te an sawi a, internet mai nilo phone call leh message service ah te pawh Mizoram puma a harsatna hmun ber nia an rinthute an sawi a. Service provider ten’a service an pek that tawkloh avanga students tam tak tana harsatna a thlen fo thu te, internet hmanga eizawngtute tan’a harsatna a tam tawh ziate leh Siaha District mipuite ten network connectivity tha zawk an thlakhlelh tawh zia thu te an thlen bawk a ni. He an harsatna te chinfel a nih theih nan Governor chu hma lak sak turin an ngen a ni.
Hetih lai hian Larsap hnenah chanchintharah te Mara hming leh khua lamrik kawnga a lam dan dik taka puan a nih thin an beisei tih an sawi a. Hemi kawngah hian DDK ah te pawh Mara tawng thiam an thawh ve ngai nia an hriat thu a sawi bawk a. Kumin Independence Day,2023-Main Celebration Delhi a hman turah MTP Gen. HQ – Cultural Troop te “Sawlakia” dance an pholan theih na tura kawng dap sak turin Larsap hnenah hian ngenna an siam bawk.
