Krismas leh Kumthar vuakveta halpuah, halmawi leh adangte khapna bawhzuiin Inrinni atang khan Champhai District Magistrate, Police, YMA leh Joint VCP te chuan joint checking an nei a. Duty-te hi Champhai DC James Lalrinchhana chuan Sub-Hqrs YMA Pisa Tlangrawt, Champhai atangin a vailiam.
Champhai District Bawrhsap James Lalrinchhana chuan kuminah halpuah, halmawi leh silai lem a mu kap chhuak theite khapna chu khauh taka kenkawh a ni dawn, a ti a. Khapna thupek chhuah hi mipui tan leh mipui that tlanna tura chhuah thin a ni a. Mipui nek chepna tura siam a ni lo tiin, mipuiin dan an zawm leh an ngaih pawimawh chuan District ralmuang leh hmasawnah Champhai District hi kan siam thei a, a ti.
DC chuan halpuah hi lung lam tha lo tan an nunna a derthawn phah thei a, boruak a tichhiat avangin ran thlengin an tuar thei a. Sky lantern avanga in kang leh chhiatna thleng dang sawi tur a lo awm tawh thin a. Khapna thupek hi tihchhuah tawh niin kumin hian khauh taka kalpui a ni dawn a, a hlawhtlin theihna turin YMA, VC, Police, Magistrate leh mipuite tanrual a ngai dawn tiin, vawiina joint checking-a thawk chhuakte chu a vailiam a ni.
Hemi puala programme buatsaih hi F.Lalrinmuana, Sub-Hqrs YMA Champhai President chuan a kaihruai a. SP Lalrinpuia Varte in thu a sawi bakah Addl. SP C.Lalengliana’n report a pe bawk.
Joint checking-ah hian Champhai khawpui chhunga dawr hrang hrangah khap thil zuar ru an awm em tih endikin dawr neitute chu khapna thupek ngai pawimawh turin an chah a. Inrinni khan silai lem a mu kap chhuak thei 7 manin a tul anga bawhzui turin Police te hnenah an hlan nghal.
Halpuah kaihhnawih khapnaah hian joint checking bakah joint operation-te neih tura hmalak a ni a. Courier service, Dawrkai Association leh a dangah zuar lo tura ngenna pek chhuah tawh a ni bawk a. Hal emaw, zuar lui emaw mante chu case siamsak tura ruahman a ni. Champhai Police-te chuan halpuah leh a kaihhnawih dang hal leh zuar hriate chu YMA emaw Police-ah emaw report turin an ngen a ni.
