Health Minister Lalrinpuii chuan Mizoram Universal Health Care Scheme (MUHCS) chungchangah Aizawl Private Hospital te nen an inrem lawk theih loh chhan chu Sorkar hmasa lama bat ral sak a tam thin em vang a nih thu a sawi a. “Tunah chuan nasa taka an inngen hnuin Cashless thei turin inbiakna an kalpui reng a, Synod Hospital-ah pawh hman theih tura an inrem thuai a beiseiawm a ni,” a ti.
Vawiin khan ZPM Southern Hqrs, Lunglei chuan Party chhung inkhawm leh Political Session hun hmangin Lalramzauva Councillor LMC/Consultant ZPM Southern Hqrs ni bawk chuan a kaihruai a, Political Session hunah Lalrinpuii Minister H&F W, Social Welfare, Women & Child Development chuan thusawina hun a hmang a ni.
Minister chuan, “Mizote hi Saving nei hleitheilo khawp a khawsa thin kan ni a, kan boral leh damloh chungchangah pawh MLA te kan ti buai hle thin a, heihi kan Sorkar hian hriain Sorkar tha nih tumin Mizoram Universal Health Care Scheme (MUHCS) chu kum 1 chuang an zirchian hnuah kumin April ni 1 khan he Scheme hi launch ani a, mipui vantlang mimir hman theih turin Rs. 2,500 pe in Rs. 5,00,000 thleng a bill theih tawh a, tunah pawh heihi mipui tamtakin an chhawr tangkai tawh hle a, lawmthu pawh an sawi nasa hle a ni,” a ti.
Lalrinpuii Minister chuan, tunlai khuarel chhiatna lo thleng hmun hrang hrang a a thlen laia bialchhunga a awm thei leh thil pawimawh dang ti tura kal mah nise hetiang chhiatna hmun hrang hrang a thlen laia bial a uap thei chu lawmawm a ti hle ani tih a sawi a, ZPM Sorkar hun kum 1 leh thla 5 chhungin theihtawp an chhuah ve ani tih sawiin Sorkarin mitthi ruang thawnchhuah chungchang a mawh an lak hnuah ruang 700 chuang an thawnchhuak tawh tih a sawi a, hmanni lawkah ruang 666 phurh man chu pek fel a ni tawh tih sawiin, tunkar chhung hian ruang 86 phurh man chu pek fel leh tur ani tih a sawi bawk.
Lalrinpuii Minister chuan, ATL Road chungchangah pawh Lunglei MLA te an tangrual hle tih sawiin, Mizoram mipui tamtak te thik khawpin Rs. Vbc 104 dah ani ta chu lawmawm a ti hle tih a sawi a, Pukpui Engineering College pawh nakkuma hman theih turin Post 63 an tifel tawh tih sawiin hmanni khan Cabinet meeting in an pawm fel tawh tih a sawi a, a kalkawng leh mamawh dang siamna’n Rs. Vbc 25 CM in a dah tawh tih a sawi bawk.
Minister zawng zawng te’n theihtawp piah lama hna an thawh ve tak meuh thu sawiin, mipuite tawngtai sakna leh support chu an duh tak meuh tih Minister chuan a sawi a, thil tih harsa leh theihloh a in nawr lui tlat an awm thin chu luhai thlak a tih thu sawiin, Minister leh MLA te hi eirulo tura intiam an nih angin an eiru velo ani tih sawiin an hlawh ngawr ngawr bak hi an ring biklo ani tih a sawi bawk.
