ZPM chuan thuchhuah siamin, “MV( Amendment) Act,2019 chu September 2022 atanga Mizoram sawrkarin kenkawh tumin, he dan zawm tura mipuite nasa taka an inbuatsaih laiin, Aizawl leh Lunglei khawpui tih lohah chuan, district khawpui dangah pollution test-na hmun tur a awm leh si lova, dan zawm duh mipuite’n harsatna an tawk nasa hle a, sawrkâr hian he dan kenkawh a tumna kawngah hian a mipuite hian dan zawm se a tih vâng nge mipuite chetsual châng a, pawisa chawi tir a tum hrim hrim vâng tih hi ZPM Ṭhalai zawhna a ni. Pollution test hi khawng taka kalpui a nih dawn chuan sawrkâr motor hlui tawh tak tak, khu chhuah nasa tak tak te’n pollution test an paltlang dan sawifiah ngei turin Mizoram sawrkar kan ngen a ni. Tin, he’ng pollution tehna khawlte hi rim taka hman a ni avangin a ‘reading’ hi a rintlak em tih hriatna turin an khawl calibration hi engtika tih nge a nih leh, calibration certificate a awm ngei em? tih kan sorkar hi kan zawt a ni.
“Tin, Aizawl khawpuiah pawh pollution test-na tur hmun mipui dawl zo a awm leh si lova, dan zawm tura inbuatsaih mipuite’n harsatna nasa tak an tawk mek a ni.
“Hetiang hi kan dinhmun a nih avângin, sawrkar hian SEDP sem tur tuakna atana mipuite man a, pawisa chawi tir hrim hrim a tum-te a nih ngawt loh chuan, district capital zawng zawngah pollution test-na khawl a awmkim hma leh Aizawl khawpui ngeiah pawh mipui dawl zo khawp pollution test-na khawl a awmhma chuan MV (Amendment)Act 2019 hi kengkawh rih lo turin Mizoram sawrkâr kan ngen a; dan zawm turin mipuite chu an inrin hle laiin, sawrkârin a dan kenkawh tum hi a tlin lo zawk niin ZPM Thalai chuan kan hria a ni,” tiin an tarlang a ni.
