Mizoram Volleyball Association (MVA) chuan ni 20.9.2024 (Zirtawpni) tlai dar 6:00 khan Hotel Chhungte International, Electric Vengah State Referee exam thar mi 26 te Result puanna leh Certificate hlanna hun pawimawh tak an hmang a, mi 26 exam te hi an tling vek a ni. He hun hi Dr. Lalmalsawma Nghaka, President MVA chuan hmanpuiin State Referee tharte lawmpuina leh fuihna thu a sawi.
Dr. Lalmalsawma Nghaka chuan District leh Zone te’n Referee ṭha tak tak nei mah se National Referee leh State Referee-te in pawimawh a ni, a ti a. MVA Tournament a ni emaw, District leh Zone Tournament a ni emaw, MVA hriatpuina Tournament-ah reng reng chuan hman theih reng leh hmantlak ngei tura chherchhuah in ni a. In exam dan pawh Theory, Practical leh Viva hmanga exam-a tling in ni, a ti bawk.
Dr. Mala chuan State Referee tling tharte thinlung takin ka lawmpui che u a. Tuna in zir aia nasa lehzuala inzir zel turin leh Mizoram Volleyball Association hruaitute chu tute pawh nise thawhpui thiam ang che u, a ti bawk. State Referee te hian National Referee nih theihna hun (chance) in nei ṭha hle a. Inthlahdah lovin tun aia nasa zawkin lo inbuatsaih deuh deuh zel ang che u, a ti bawk.
Pu Mala chuan Media/Social Media a chak tawh a. Khawvelin a ni telin Internet leh Broadcasting-ah hma a sawn zel a. Kan Tournament neih reng reng hi TV emaw, Youtube emaw kaltlanga Live Telecast a ni tlangpui tawh a. Kan tihsual leh tih dik loh a lang hma tawh em em a, vawiina tling tharte bakah kan National leh State Referee neihsa te hi in ṭan lehzual a ngai a. Player-te zahtlak khawpa in nungchang in fimkhur a, eizawnna satliah chauh a ni lo tih hre turin ka duh che u a ni, a ti.
He hun hi Pu Donald Lalthanmawia Khawlhring, Vice President MVA chuan a kaihruai a. Hunserh Pu MS Dawngliana, EM MVA chuan hmangin; Pu Henry MS Dawnga, Secretary Technical chuan report a pe bawk a. Resource Person aiawhin Pu Lalduhawma Hnamte, National Referee chuan thu tawi a sawi bawk. State Referee tling tharte Certificate hlanna hi Pu R.K. Hmingthanga, Joint Secretary MVA chuan neiin; Pu Lalmawizuala, Sr. Vice President MVA chuan lawmthu a sawi a. State Referee tling thar Top-5 te hi Dr. Lalmalsawma Nghaka, President MVA chuan ₹ 2000/- ṭheuh a pe bawk a ni.
