Vawiin ni 24.9.2022 (Inrinni) kham Joint YMA Multi Purpose Hall, Vaivakawn-ah District 2nd Division Season Opening Tournament 2022 final khelh a ni a. MVA President Dr. Lalmalsawma Nghaka’n a hmanpui.
“”…. Vanneihna hi thawhrimna nen lo chuan a chan theih loh…”
– Dr. Lalmalsawma Nghaka, MVA President.
Khuallian Dr. Lalmalsawma chuan, Mizorama Volleyball dinhmun than chhoh dan chu lawmawm a tih thu vawiin, hetiang dinhmun Mizoram Volleyball a din theih chhan chu hruaitute inpekna leh thawhrimna vang a ni, tih sawiin an inpekna avangin infiammite tam takin an talent an phochhuah bakah eizawnna an neih phah a ni a ti.
Mizoram chhunga infiamna hrang hrang enkawltute inpekna leh thawhrimna ang hian ram hruaina thawktute leh Politician te pawhin an enkawl mipuite tan chan huamin hma la se Mizoram hei ai hian dinhmun zawkah a din a beisei tih sawiin, hruaitute pawhin sum leh paiah hlawkna nasa tak an hmu kher lo mai thei a, mahse an thawhrimna avanga infiammi tam takin eizawnna leh insumtheihna an nei chu ram tan a hlu a, midang tana malsawmna a ni, a ti.
Dr. Mala chuan, infiammi, talent tha tak tak nei thawhrimna leh insumtheihna an neih loh avangin an hlawhchham fo tih vawiin, thawhrimna tel lova hlawhtlin chu thil harsa tak a ni a. Thawhrimna tel lo dinhmun tha chuan ngaihhlut a hlawh ngai lo. Vanneihna pawh thawhrimna nen lo chuan a chan theih loh. Hlawhtlinna tak tak sual chhuak si lova vanglai hun tha khawhrala thamral a pawi tih sawiin, Infiamna chu Kristiante tan chanchintha hrilna tangkai tak a ni, a ni a ti bawk.
Khuallian Dr. Malsawma MVA President hian Zone-A hruaitute hnenah hian a tul apianga an hman turin tangkafai a pe bawk.
Mizoram Volleyball Association hnuaiah District Volleyball Association 11 an awm.a. Aizawl District Volleyball Association hnuaiah 1st Division Team Mipa Team 8 leh Hmeichhia Team 8 an awmin, ADVA hnuaiah hian 2nd Division awmna Zone 6 awmin, Zone-A hnuaiah hian Club 17 awmin tun Tournament ah hian team 16 an tel a. Final hi Vanghro Volleyball Club, Chawnpui leh Zara Memorial Volleyball Club, Dinthar ten an khel a ni
Final ah hian Zara Memorial Club Dinthar hian 25-17, 25-22, 25-21 in Vanghro Volleyball Club Chawnpui an hneh a ni.
