Awithangpa Group YMA chuan thuchhuah siamin, “Awithangpa Group YMA chuan Kolasib District chhunga Khamrang khua-ah Myanmar Raltlan awm mek mi 110 te dinhmun zirchiang turin Study Team a din a. Dt 6.May.2023 atanga Study Team te zirchianna leh Sawrkar hmalakna tur nia an hriatte chu vawiin khan DC, Kolasib hnenah kan thlen.
Thil langsar zual kan thlen te zingah hian
i) Khamrang ah Adhaar Card nei mi 3 hmuh chhuah an ni a; (Photo copy DC pek a ni)
ii) Federal Bank Aizawl hnuaia Bank Account nei mi pakhat an awm a; (Photo copy DC pek a ni)
iii) Income Tax Deptt hnuaia PAN Card nei pakhat a awm bawk. (Photo copy DC pek a ni)
“Adhaar Card ah chuan (Village : Khamrang, Sub District : Bilkhawthlir, District : Kolasib) tiin a inziak hlawm a. Pa hming ziak lovin C/o an dah a; mahse Khamrang VC leh YMA in an C/o te hi tu nge an nih an hre lo.
“YMA chuan heng Document an hmuh theih bak pawh hi a la awm ngei kan ring a ni.
“Adhaar Card siam tur hian Aizawl Dawrpui veng mi pakhat in Solomons Cave ah a kalpui thin a. Raltlan te chuan Document pakhat ah Rs 8000/- zel an chawi niin an sawi.
“Adhaar Card siam tur hian Birth Certificate neih ngei a ngai a. Hei vang hian Birth Certificate pawh hmuh chhuah loh a awm ngei kan ring bawk.
“Awithangpa Group YMA chuan Pu John L T Sanga, DC Kolasib hnenah Myanmar atanga Raltlan anga rawn chhuk ten Indian Document pawimawh tak tak an neih theih dan chhuichhuak a, thil tidiklo an awm anih chuan Dan hmang hrem tur leh an Document te chu Cancell tura hma la turin kan ngen a ni. YMA in a hmuh chhuah theih loh Document dang la awm thei te pawh dap chhuak turin kan ngen a. Raltlan te hi a duh na hmun hmuna zin kual, a chang chuan State pawn ah te an zin a; an pem kual fo a. Chuvangin Kolasib DC hnenah hian Raltlan te awm dan tur kaihhruaina siam turin kan ngen bawk a ni.
“DC Kolasib chuan Foreigners ten Indian Document an neih hi thil namai lo tak a ni a; Police lam hotute nena an lo ngaihven zui tur thu a sawi a ni.
“Group YMA hruaitute chuan Khamrang-a Raltlan te mamawh leh harsatna an neih mek te pawh kan thlen tel nghal a. YMA chuan Dan hnuai-ah Raltlan te chu chhawmdawl leh tanpui an ngaihna apiangah kan tanpui zel dawn tih DC hnenah hian kan hrilh bawk a; kan Unaute an nih angin thlahthlam a rem lo a ni kan ti,” tiin an tarlang.
