Thawhlehni chawhnu lama Myanmar indo thlawhnate’n bomb hmanga Chin National Army (CNA) hmunpui ‘Camp Victoria’ an beihnaah mi 5 an thi.
Farkawn leh Vaphai khawtlang hruaitute sawi danin Thawhlehni chawhnu dar 3:33 vel khan Myanmar sipai indo thlawhnate hian Farkawn khua atanga hnai te, Tiau lui kama awm Camp Victoria chu beiin, bomb 5 vel an thlak a. CNA hmunpui a an hotu pakhat sawi danin thite hi mipa pathum leh hmeichhia pahnih an ni a. Mipa thite hi Salai Van Ro Piang, Salai Duh Tin leh Salai Kil Mang te an ni a, hmeichhe thite hi Mai Ngun Hlei Par, Mai Sui Len Par te an ni. An awmna bahrik chhung takah bomb a tlak avanga thi an ni a. CNA mi vek an ni a. An hnena training mek People’s Defence Force an tih mai, mipui sipaite erawh chu an him ni a thudawn a ni.
An sawi dan chuan bomb thlak avang hian hliam an awm lova. Camp Victoria chhunga an damdawiin-a enkawl lai mi 20 vel erawh chu bomb hmanga beih an nih hnu hian chhuahtirin, an khaw lam theuhah an haw a. An zinga damlo pakhat erawh chu a nat deuh avangin Aizawl lama enkawl tura rawn phurh thlak a nih thu an sawi.
Thawhlehnia Myanmar sipai indo thlawhna-in bomb a thlak khan India ram chhung chin, Tiau lui atanga India lam meter 30 velah bomb pakhat chu a tla a. Camp Victoria an beihnaah hian India ram chin vansang an rawn lut niin an sawi bawk a ni a. Farkawn khua a truck pakhat chu a darthlalang a keh chhe hle bawk a ni.
