Vawiin Ni 18.5.2022 (Nilaini) hian Dawrpui Multipurpose Centre-ah Myanmar ram tualchhung buaina avanga Mizorama rawn raltlan mi engemawzat chuan a mamawh apiangte hman turin thisen an pe.
He Group Blood Donation buatsaihtute chuan Mizo mipuite tana an thisen pek an duhna chhan sawiin, Myanmar raltlan te chuan Mizoram mipuite, tlawmngai pawl hrang hrang, Kohhran hrang hrangte, political party hrang hrangte leh Mizoram Sawrkar lakah te kawng tin renga an lawm zia lan tir nan leh lawmthu sawi nana an tih theih tawkte kawng tinrenga hlan let ve an tumna kawngah a hmasa ber atan, a mamawh apiangte tan an thisen chu pek nise an tih avanga he hun hi buatsaih an nih thu an sawi a. Mizo mipui zawng zawngten he an tih theih tawk an tih hi an lawmthu sawina a lo pawmsak turin an ngen bawk a ni.
Myanmar raltlan ten a mamawh apiangte hman tura thisen an pek hi Civil Hospital Blood Bank-in lawm taka an lo dawn sawn avangin lawmthu an sawi a. Relief camp hrang hranga awmte an nih avangin a hlawma an pek theihna tur hmun leh hma buatsaihsaktu Dawrpui Branch YMA chungahte, kawng tin renga an mamawh angte ngaihtuahsaktu Association for Voluntary Blood Donation (AVBD) hruaitute chungahte, kawng hrang hranga an hnung dawlsaka an hma hruaisak rengtu Central YMA chungahte thinlung takin lawmthu an sawi a. Thisen petu turte hruaikhawmna tur lirthei leh an ei leh in tur buatsaihsak tu, Mosia Agency, Pu C. Laltanpuia te chhungkaw chungah lawm thu an sawi bawk a ni.
Myanmar raltlante buatsaih thisen pek runpui vawiina neihah hian Thisen pek inhuama kal mi 100 chuang atangin unit 48 (Mipa – 36 leh Hmeichhia 12) ten thisen hi an pe a ni.
