Dr. Vanlaltanpuia, Chairman Mizoram Youth Commission, Vice Chairman Higher & Technical Education Board ni bawk chuan nimin Dt. 25.09.2022 Pathianni khan Mizoram House, Sun Tower Building, GD Ambedkar Marg, Bhoiwada, Parel, Mumbai tlawhin thawktu te leh damlote leh a enkawltu (attendants) zawng zawng te tan zanriah a buatsaihsak. MYC Chairman hi Pune Mizo zirlai Pawl te’n kumin 2022 a zirlai thar te puala Dt.26.09.2022 Thawhtannia Freshers’ Social an buatsaih turah khuallian tura sawm niin chumi program hmang tura kal a ni. He program hmang tura a kal pahin Tata Cancer Damdawiin pantu Mumbai Mizoram House-a damlote a tlawh a, an mamawh leh harsatna neih te a hmunah enpuiin, an harsatna tawhte ngaihthlaksakna hun a neihpui a ni.
Mizoram House-a function tawi neihah Dr. Vanlaltanpuia chuan thusawiin damlo Mizo mipuite mamawhna hriaa MNF Sorkar hmasain Mumbai Mizoram House a lo siam chu a lawmawm takzet a ni a ti. Hemi atana ruahmanna siamtu Chief Minister Pu Zoramthanga leh Pu Lalrinchhana(L) Ex-minister leh khatih laia Health & Family Welfare Dept changtu Pu. R. Tlanghmingthanga te an fakawm takzet a ni; an hnathawh ropui avangin hetiang hmun hla takah pawh Mizo te’n remchanna kan neih phah nasa hle a ni a ti. Inenkawlna senso hautak em em pawh he House din a nih atang hian a ziaawm phah hle a ni a ti.
Damlo ten harsatna an tawh leh house enkawlna atana thil tul leh mamawh an lo thlen te chu General Administration Dept. changtu Chief Minister hnena thlensak a tum thu a hrilh a ni. Damlo te ngaihsaka thlamuan tura MLA a lo kal chu an lawmzia damlo leh a enkawltute’n an lo hrilh a ni. Dr. Vanlaltanpuia hi Deputy Resident Commissioner Pu Lalruatliana leh thawktu dangte’n an lo dawngsawng a ni.
