Aizawl, 26th March 2022 :
Vawiin khan Lunglei North bialtu MLA, MYC Chairman Dr Vanlaltanpuia chuan Serkawn, Lungleiah Mizoram Youth Commission Incubation Centre tur lungphum a phum. MYC Incubation Centre hmun tur hi Lena Stadium bulah awmin a ram hi Serkawn VC te pek a ni.
He hunah hian Lunglei High Powered Committee Vice Chairman Pu Lawmawma Tochhawng, Pu H. Lalnunzuala, Under Secretary MYC, Pu Lalrotluanga, President YMA Sub Hqrs Lunglei leh Serkawn khawtlang hruaitute leh tlawmngai pawl hrang hrang aiawhte an tel a ni.
Mizoram Youth Commission Chairman Dr Vanlaltanpuia chuan MYC Incubation Centre-ah hian thalaite hmasawnna tura hmalakna hrang hrang – competitive coaching, Information Technology, skill development leh entrepreneurship-te a len vek tur thu sawiin residential tura ruahman a nih thu a sawi a. Thalaite hmakhua ngaia an ram phal taka pe tu Serkawn khawtlang te chungah lawmthu sawiin an ram pek chu kan human resource tih hmasawnna kawngah leh kan ram economy than len zelna kawngah tangkai taka hman anih tur thu a sawi.
A sawi zel naah MYC Chairman chuan Mizo thalaite hmasawnna turin MYC chuan theihtawp a chhuah zel dawn a ni tiin Lunglei, Siaha leh Kolasib District -ah te MYC Coaching Centre hawn tawh niin Champhai ah pawh hawn leh thuai tum a ni a. Aizawl leh Serchhip ah MYC Youth Centre sak mek niin, Lunglei ah MYC Youth Centre sa tura ruahmanna a kal mek thu a sawi a. Mizo thalaite hawizau zela, National level chona va man phak ve tura kawng kawhhmuh zel MYC chuan a tum thu sawiin competitive exam coaching mai bakah cement mistiri training, food processing training, cake baking training, cabin crew, Army Pre-Recruitment training, music leh sports lamah te hmalakna kal mekin heng hmalaknte hi zau zawka kalpui zel tum anih thu a sawi.
Kum 2020 atanga kalpui MYC Super IAS 20 chungchang pawh sawilangin MYC Chairman chuan heng zirlai thlanchhuah 20 te hi MYC sponsor in Delhi ah thla thum (February – March 2021) coaching zuk kalin MYC nena agreement an neih ang ngei in UPSC Preliminary Exam 2021 chu an zavaiin an ziak veka. Agreement-ah hian MYC Super IAS 20 te hian UPSC 2021 an tlin loh chuan kum thum dang (2022-2024) preliminary exam an bei leh tura tih niin hemi karah hian state level competitive exam emaw exam dang an ziah phalsak an ni a. Heng exam te an ziah avang hian kan agreement an bawhchhe lo a ni, a ti a. Super IAS hi zau zawka kalpui tum niin Super IAS 40 kalpui turin budget ah cheng vaibelchhe 2 dah fel tawh a nih thu sawiin chhimlam District zirlaite lo ngaihven ve ngei turin a chah a ni.
Hemi bakah hian Khawiva panna kawng, Aizawl-Thenzawl-Lunglei kawng leh Lunglei khawpui chhung kawng te siam that tur anih thu sawiin MZU Southern Campus tura ruahman chei that hna pawh tluang taka kalin a budget hi cheng vaibelchhe 15 ah tihpun anih thu a sawi bawk.
Lunglei High Powered Committee Vice Chairman Pu Lawmawma Tochhawng pawhin thu sawiin MYC hnuaiah thawktu staff tlemte chauh awm mahse Mizo thalaite tana an hmalakna hi a hlu in a chhuanawm takzet a ni, a ti a. Lunglei khawpui ah zirna in changtlung tak Incubation Centre kan nei tur chu kan vannei takzet a, mipuiten kan hlut a kan hman tangkai thiam a tul dawn a ni tiin Lunglei District thalaite chu tun aia hawizau tur leh tih tak takna nena hma la turin a sawm a ni.
Vawiin program-ah hian Pu Lalrotluanga, President YMA Sub Hqrs Lunglei leh Pu K. Zodinsanga, VCP Serkawn te pawhin thu sawiin Pu Lalmuanzuala, CC, MYC Lunglei in lawmthu sawina hun a hmang a ni.
