Nimin ni 6th April, 2022 (Nilaini) khan MZP hruaitute chuan MZP President Pu Lalnunmawia Pautu hoin Phainuam, Buarchep rama Assam lei dawh leh Bairabi Zophai hmuna Mizoram lei dawh mek chu a hmunah enfiahin an tlawh.
MZP hruaitute chuan, “State pahnihte inremna Status Quo tha taka Mizoram Sawrkarin a zawm lai leh Bairabi Zophaia lei dawh mek pawh laklawh taka chawlhsan a nih mek laiin, Assam lamin Phainuam Buarchepa Status Quo chhung Assam Police te duty-na piah lamah thir leihlawn tha tak mai hun reilote chhunga a dawh chu hriatthiam har a ti hle a. Kutthlak lo tura state pahnihte inremna (Status Quo) zah loah Assam sawrkar kan ngai a kan dem takzet a ni.
“Mizoramin hmathar a lak apianga Assam lamin an rawn ngaihmawh em em laia, Assam lamin Status Quo chhungah hma thar a la thin hi tha kan ti lova. Assam lamin hetiang hmalakna a kalpui fo avangin, Bairabi Zophaia Mizoram sorkarin lei a dawh mek; hun rei tak chawlhsan tawh chu chhunzawm ve nghal turin MZP chuan thuneitute a ngen nghal a. Kan ram kan chan zel loh nana kan ramri uluk taka vil turin leh Assam chet dan uluk taka thlithlai reng turin MZP chuan thuneitute a ngen nghal a ni,” an ti.
Heng MZP duhdan hrang hrang leh ramri humhalh tura hmala turin vawiin ni 7th April, 2022 (Ningani) chhun dar 12 khan Pu Lalnunmawia Pautu President hoin, MZP Headquarters Kolasib leh MZP Sub Headquarters Vairengte President te chuan Mizoram Chief Minister Pu Zoramthanga chu a office-ah an hmu nghal a. Chief Minister chuan a tul anga MZP rawtna hrang hrangte lo bawhzui a, lo enzui a tum thu a sawi a, MZP chuan lawmawm kan ti hle a ni, an ti bawk.
