Mizo Zirlai Pawl (MZP) Special Assembly 2023 chu vawiin ni 9 February, 2023 (Ningani) chawhnu dar 1 hian Zofate Chawlhbuk, Borapansury Lawngtlai District-ah neih a ni a. Mizoram chhunga hnamdang sumdawngte chungchang te, Chakma Foreigners chungchang leh Zirna kaihhnawih bakah pawl chhung khawihte rel a ni. Special Assembly rorel inkhawm hi MZP General Headquarters President Lalnunmawia Pautu in a kaihruai.
Rorelnaah hian MZP President Lalnunmawia Pautu chuan thu sawiin, “Ram in chhan a ngaih chuan, MZP khawiah nge a awm? tih a ni fo thin a. Kan ram leh hnam tan MZP hi kan ding tlat tur a ni” a ti. “Borapansury hi CADC chhung Mizoram chhung ngei a nih avangin, ram chhan nan leh hetiang laia Zofa zin veivakte chawlh hahdam nan MZP hruaitu hmasa ten hetiang laiah Zofate Chawlhbuk an lo din a, a hlu takzet a ni” a ti bawk.
MZP Special Assembly chuan, MZP Assembly vawi 66-na, nikum 2022 a Darzo-a neihin thu a lo dah tawh leh thupawimawh tak tak hetiang hian a rel:-
1.Mizoram chhunga Chakma Foreigners awmte hnawhchhuah a nih theih MZP-in hmala rawh se.
2. Mizoram chhunga hnamdang dan loa sumdawngna kalpui mekte hi MZP-in dapchhuah nise, Mizoram sawrkar-in tihtawp a nih theih nan hma lak ni rawh se.
3. Kan Mizo nunphung leh kan history te a tam thei ang ber zirlaibu-ah telh a nih theih nan MZP-in hmala rawh se.
4. Kum 2019 a Mizoram Legislative Assembly-in a lo passed tawh, Mizoram Governor- in a pawmpui loh, “The Mizoram Maintenance of Household Register Bill 2019” hi a hlawhtlin theih nan MZP-in hmala rawh se.
5. Mizoram zirna in hrang hrang School, Hostel Fees leh Facilities a in mil em tih zirchiangin a tul angin MZP in hmala rawh se.
Rorel zawh hnuin, MZP hruaitute leh Borapansury V.C te chuan inkawmna hun an nei a. Borapansury leh a chhehvel a Chakma Foreigners a ruka Mizoram a lo lutte chungchang leh, hmalak ho dan tur an sawiho nghal a ni.
MZP Special Assembly-ah hian MZP General Headquarters, Headquarters, Sub Headquarters, Branch, College SU leh Hnampual zirlai pawl aiawh te an tel a ni.
