Vawiin ni 12 March, 2024 (Thawhlehni) chhun dar 12 khan MZP General Headquarters, Adviser & Extended OB Meeting a thukhawm a, India Citizenship (Amendment) Rules, 2024 nimina tihchhuah chungchang leh Aizawl Municipal Coorporation (AMC) hnuaia hnalak dan diklo chungchang rel a ni. Meeting hi MZP President Pu H. Lalthianghliman a kaihruai a ni.
Meeting chuan Aizawl Municipal Coorporation (AMC) hnuaia Geologist-3 leh Urban Animal Husbandry & Veterinary Officer, Junior Engineer leh Asst Account Officer pakhat theuh lak danah dan kalha thiltih a awm ngeiin a hria a. Mimal induhsakna uchuak tak nena heng hna pawimawh tak hi lak ngei niin hria a. Dan angin Advertisment chhuah a nih loh bakah, State sawrkar phalna an lak hriat a ni bawk lova, danin a sawi angin MPSC emaw MSSSB kaltlanga lak a ni lo bawk. Chuvangin, heng hnalak dan diklo hi MZP chuan tun kar chhung (March ni 15) ral hma ngeia sut turin AMC hotute a ngen a ni.
MZP Meeting chuan, sawrkar hna lakah a thiam leh tlingte chauh lak zel a duh a. Mimal induhsakna hmanga hnalak hi kalpui tawh lo turin mitinte a ngen nawn a ni.
Citizenship (Amendment) Rules 2024, nimin ni 11 March, 2024 a tihchhuah chu North East Students’ Organisation (NESO)-in tunhma atanga a dodal tawh a nih avangin, North East State tinah a order copy hal tura tih angin MZP chuan Citizenship (Amendment) Rules 2024 copy chu MZP pisapui kawtah a hal a ni.
Order copy halnaah hian North East Students’ Organisation Vice Chairman Pu Rikcy Lalbiakmawia leh MZP hruaitute an tel a ni.
