Mizo Zirlai Pawl chuan April ni 7, 2022-a India ram pum huap BJP Hruaitu Amit Shah in India ram chanchinbu hrang hrang a, ‘Hindi ṭawng chu North East State pariat (8)-ah zir ngei ngei tura duan a ni dawn,’ tia a sawi chu ṭha lo a ti hle a. North East State chhunga State hrang hrangah mahni state hnam ṭawng hman a nih lai leh mahni pianpui ṭawng hmang tura nasa taka hmalak a nih mek laia hetiang hmalakna a awm hi MZP chuan hriatthiam har a ti hle a ni.
North East Region (NER)-ah Hindi ṭawng Compulsory-a hman a nih chuan hnambil ṭawng leh pianpui ṭawng nasa taka a khawih dal theih dawn bakah zirlaite tân phurrit a nih theih dawn avângin Hindi tawng Compulsory Subject-a dah lovin, a hmaa kalphung pangngai hman chhunzawm a nih theih nan MZP chuan hmalak zel a tum a ni. He thil hi BJP in RSS chang vawn ram pakhat, ṭawng pakhat, sakhua pakhat tih puitlinna tura an hmalaknaah MZP chuan a ngai a. Ram leilung fate nuai bo tumnaah MZP chuan a ngai bawk.
He thuchhuak hi hnuhkir a nih thuai theih nan hmala turin MZP chuan thuneitute a ngen nghal a. MZP chuan hemi chungchanga North Eastern Students Organisation (NESO) hmalakna chu a thlawp zel dawn tih an sawi a ni.
