Vawiin khan MZP chuan MJA member-te chu lengah sawmin inkawmna hun an hmanga, MZP President H.Lalthianghlima chuan, tunlaia an buaipui ‘MLA Candidate-a Hnam dang pasal nei dah loh nise’ tih chungchanga an hmalaknate a sawi a, dah lui an awm chuan kawng zawh hialte pawh an tum bakah an tlak theih ngeina tura hmalak an tum thu a sawi.
Lalthianghlima chuan, “MZP chuan ram leh hnam himna tur hi a lungkham leh ngaihpawimawh ber a ni thin a. Pawl thiltum 11 zingah; ‘Inchimral theihna laka Mizo Hnam humhalh’ tih leh ‘Mizoram leh Hnam tluchhe tur ven tlat’ tih hi a tel nghe nghe a ni.
“MZP chuan kum 2015 atangin, Mizo hnam a lo him zel theih nan September ni 2 hi, ‘Hnamdang nupui pasal neih loh inzirtirna ni’ tiin kumtin a lo hmang thin a. Hnamdang kawppui neih hi Mizo hnam tan a pawi tur zia leh, hnam kal zel atan a ṭhat loh zia zirtirna pek thin a ni. Hnamdang kawppui neilo turin kumtin zirlai a sang telin thutiam an la thin bawk.
“MZP chuan hnamdang kawppui nei lo tura inzirtirna a kalpui bakah, Mizo hmeichhia hnamdang pasal neite MLA Candidate a dahlo turin, MLA Election apiangin party tinte hnenah ngenna a lo thlen tawh thin a. Kumin 2023 Election lo awm tur-ah pawh hian Hnamdang pasal neite MLA Candidate an awm loh nan December ni 19, 2022 daih tawh khan Party tinte hnenah ngenna lehkha a pe vek a ni.
“Ram leh hnam himna atana MZP ngenna chu Party tinte pawh hian an zahin, Party thenkhat phei chuan hetianga Candidate beiseite pawh an thlak phah hial a. MZP chuan lawmawm a ti hle a ni. Chutih laiin tun hnaiah hnamdang pasal nei ngeia hriatte hming Candidate turin a ri ring hle tih hriat a ni a, MZP chuan ni 21 August, 2023 khan Party tinte hnenah MLA Candidate a hnamdang pasal neite dah lo turin ngenna a thawn nawn leh vek a ni.
“MZP chuan theih ang angin, Party President te pawh hmaichhanah hmuin, a lo sawipui tawh a. Beiseina sang tak nen a thlir mek a ni. Mizoram rorelna sang ber Assembly House-ah meuh hnamdang pasal neite thut ve hi MZP chuan rem a ti ngai dawn lova, mahni hnampuite aia hnamdang neite hian ram leh hnam thil tak tak an vei phak hi MZP chuan a ring lo a ni.
“Mizo hnam dan “The Mizo Customary Law” Published by Law & Judicial Department Govt. of Mizoram bung 3:74-na chuan, ‘…Mizo hmeichhiain hnam dang pasal a neih chuan hnam dang chhungkuaah a luta ngaih a ni,’ a ti a. MZP chuan Mizo hmeichhia hnam dang neite chu hnam dang chhungkuaah a ngai nghet tlat a. Mizo mipui aiawha ram rorelna sang bera thu turin a pawm thei lo a ni.
“MZP chuan Political party tinte hnamdang pasal neite Candidate a dah lo turin a ngen nawn a, Mizo mipuite pawhin MZP dinna hriaa hetianga hnamdang chhungkuaa lutte an lo Candidate a nih pawhin lo hnawl ngam turin a ngen bawk a ni,” a ti bawk.
