“MZP chuan tun (July) thla chhung ngeia NHIDCL-in an enkawl kawngpui chhe zual lai Motor kal theih tura thuam tha vat vat turin a phut a. An hmalak dan MZP in uluk takin a vil dawn bakah, a tul angin a bawhzui zel dawn a, kawng siam hna an thawk lo tih kan hriat chuan an office te pawh kan kalh ve ang,” MZP President Lalthianghlima chuan a ti.
MZP President chuan vawiin khan Aizawl Press Club-ah chanchinthar lakhawmtute a kawm a, “MZP rorelna sang ber dawttu Federal Council vawi 59-na chuan, ‘NHIDCL hnathawh hi a that tawk loh thin avangin, a that zawk theih nan MZP-in hma la chhunzawm zel rawh se,’ tih a rel a.““Hemi chungchângah hian ni 17 July, 2025 khan NHIDCL Executive Director (ED) Virendra Jakhar sawipui tum ni mahse chawlh a lo lak avangin hmuh theih a ni lo.
“MZP chuan Mizoram ei leh bar lakluhna kawngpui pawimawh em em, kal hleih theih loh khawpa a chhiat laia NHIDCL hotupa ber Executive Director-in August ni 7 thleng chawlh ala daih mai hi hriatthiam har a ti hle a. Mizo mipuite min hmuhsitu NHIDCL Executive Director hi Mizoram a awm tlakah MZP chuan a ngaih loh bakah, a deputation term a tawp tawh avangin, a term pawhsei a remti lova. NHIDCL E.D hi Mizoram-ah lo let leh tawh lo turin a hriattir nghal a ni.
“Mizoram ei leh bar lakluhna kawngpui pawimawh em em, a chhiat lutuk avanga kal hleih theih loh khawpa a chhiatna lai hi NHIDCL enkawl lai a ni a. March ni 26, 2025 khan Mizoram PWD chuan Bilkhawthkir – Kolasib (Km 70-95) leh Kawnpui / Khamrang (Km 118-133) chu NHIDCL kutah a hlan a ni. (Ref. Letter No.D-10024/1/2020-PWD/NHD-Iii/32, Dated Aizawl the 26 March 2025),
“Hetiang a fur khaw chhiat vanglai taka, NHIDCL Executive Director-in chawlh a la hi MZP chuan mak a ti hle a. Lirthei khalhtute mangang au thawm pawh engahmah ngai lova, a ral thlir mai mai hian Mizoram mipuite min hmusit hleah a ngai a, riltama Mizoram mipuite kan thih mang vek pawh pawi an ti loah kan ngai. Chuvangin, MZP chuan tun (July) thla chhung ngeia NHIDCL-in an enkawl kawngpui chhe zual lai Motor kal theih tura thuam tha vat vat turin a phut a. An hmalak dan MZP in luk takin a vil dawn bakah, a tul angin a bawhzui zel dawn a ni,” a ti bawk.
