MZP chuan January thla ral hmaa Mizoram Subordinate Services Selection Board (MSSSB) Chairman bàn tura sorkar an phûtna a hlawhtlin loh avangin nimin khan MSSSB Chairman pisa kai dan tumin Mizoram Secretariat kawtah an pung khawm.
Punkhawmna ah hian Aizawl College hrang hrang zirlaite an tel a, MSSSB Chairman chu Mizo thalaite duhsak tawk lo leh hnam thinlung pu loa Mizo thalaite hmakhua ngailo ah puhin bang tura an duh thu an au rual pui.
MZP President Lalnunmawia Pautu chuan Mizo thalai thiam tak tak hna zawng mek an awm tih sawiin Mizo thalai thiam leh hna hmu tlak te an luh ve zel theih chu MZP in an duhdan a nih thu a sawi a, tuna an punkhawm chhan an hna lak chu state dang atanga dil theih ani lo tih sawiin, State Quota anih avangin Mizo ngei tling se an duh a ti a, CADC leh Autonomous Council danga hna lakah te Mizo thalai tlin a harsat thin avangin state sawrkar hna lakah chuan Mizo ngei tling se an duh thu a bawk.
MZP President chuan MSSSB ten tun hnaia an hna lakah hnam dang an awm thin avangin MSSSB chu tha takin MZP ten an ngen a ti a, Mizo thalai zingah hna zawng mek thiam tak tak te chu lak theih dan kawng zawnga tang tlang turin an ngen thu a sawi a, tun hnaia hna lakah hnam dang mi 3 an la leh chu hriatthiam har an tih thu a sawiin sawrkar hna a van tawh em avangin Mizo thalai thiam tak tak te hmakhua chu an ngai pawimawh tih a sawi bawk.
MZP President chuan DP&AR in Mizoram Sawrkar hna laka Recruitment Rules a neih mek chu siam that ngai lai tam tak a awm a ti a, sawrkar chuan siam tha thuai se an duh tih a sawi.
Hetih lai hian MZP hruaitute hi nimin khan Deputy Chief Minister Tawnluia’n a pisaah kawmin, an lungawi lohna lantir mek chu chawlhsan turin a ngen a.
MZP chuan sawrkar hmalakaah lawmna tur a awm loh avangin February 2, 2023 hian MSSSB chairman pisa kai tur dan chhunzawm a ni ang a, awmzia a neih loh zel chuan February ni 3 hian Aizawl khawpui chhungah MSSSB chairman ban ngiatin zirlaite kawngzawh huaihawt an tum.
