Vawiin ni 16 July, 2025 (Nilaini) chawhnu dar 1 khan MZP rorelna sang ber dawttu Federal Council vawi 59-na MZP Conference Hall-ah neih a ni a. He hun hi Dr. C. Lalremruata MZP General Headquarters Vice President in a kaihruai a ni.
Rorel tan hmain MZP President H. Lalthianghlima chuan thu sawiin, MZP-in Mizo hming hawha Mizoram chhunga hnamdang sumdawnna kalpui an tam ta lutuk leh an huangtau lutuk a vei thu sawiin, tlang hrang hranga MZP ten theih ang anga hnamdang hming hawha sumdawngte dap chhuaka, hma turin a sawm.
MZP President chuan, Hnamdang zingah Mizoram a lirthei khalh an tam thu sawiin, mistiri ten an duh duh dana rate an inchhiar leh, contractor ang maia contract system a thil an kalpui hi MZP chuan kan ngaimawh hle a ni. Sawrkar hnathawk leh Department zingah, an hamthatna in a ken tel entitlement aia tam lirthei kawl an awm tih MZP in a hria a. A tul angin kan bawhzui ang a ti bawk.
MZP Federal Council Sitting vawi 59-na chuan, hengte hi MZP rorelna sang ber Assembly 2025 Agenda atan lungrual takin a pawm:—
1. Sairang thleng a rel a lo luh dawn avangin, Mizoram chhunga rel tlanna kawng/ chawlhhmun (Station) ah ILP checkpoint siam a nih theih nan MZP in hma la rawh se.
2. NHIDCL hnathawh hi a that tawk loh thin avangin, MZP in a that zawk theih nan hma la rawh se.
3. Zofa hnam inkhawmpui lian “ZOFEST” hi 2026-ah neih leh ni rawh se.
MZP Federal Council chuan, Sawrkar hnathawk pension tawh rawih nawn chungchanga MZP ngaihdan a la ngai reng tih nemnghetin, Sawrkar hnathawk pension tawhte rawih nawn an nih loh nan hmalak zel nise a ti.
MZP Federal Council-ah hian, MZP Headquarters, Sub Headquarters, Branch, Hnampual leh College SU atangin rorel palai an tel a ni.
