MZP Gen. Hqrs. hruaitute chuan, vawiin khan Mizoram Chief Minister Zoramthanga chu a office-ah an hmu a. Ramri chungchang te, NHIDCL kawngsiam chhe lutuk chungchangte, Zo hnam khawmpui lian Zofest 2022 chungchang leh thil pawimawh hrang hrang an sawipui a ni.
MZP hruaitute chuan tun hnaia Assam sorkarin Bairabi Zophaia Status Quo chhunga kut an rawn thlaka, thlam pahnih lai an sak chungchang an sawipui a. CM in rang taka hma a lak avangin lawmthu an hrilh a, chutih laiin Assam chet dan hi uluk taka thlithlai reng a ngaih thu leh an hmalakna chu na taka chhanglet vat zel turin an ngen a. Mizoram Chief Minister pawhin a theihna apianga hma a lak tur thu leh, Assam Chief Minister nen pawh sawi dun an tum thu a lo sawi a ni.
Mizoram hmun hrang hranga kawngpui siam mek thawktu NHIDLC te sulhnu chu a chhe hle a, a bik takin an lung hman chuan duhthu a sam loh avangin hmala turin MZP chuan Chief Minister an ngen a. Chief Minister chuan a lo enzui tur thu leh a concern Ministry pawh sawipui a tum thuin a lo chhang.
MZP chuan, Zo hnam inkhawmpui lian Zofest kum 2002 atanga lo hman tawh chu kumin December ni 6-9 chhung hian Thenzawl-ah hman an tum thu an sawipui bawk a. A hlawhtlin theih nana theihtawp a chhuahpui tur thu Chief Minister hian a lo hrilh bawk.
MZP hruaitute chuan Thangram Indigenous Peoples Movement (TIPM) in an chenna 180 Sq. Miles Mizoram State chhunga rinlut tura an hmalakna chu a theih ang anga hmalakpui turin an ngen nawn bawk a. Sawrkar-in theih ang anga hma alak mek thuin alo chhang a ni.
MZP chuan Mizoram Chief Minister-in an thu thlente tha taka a lo dawnsawn avangin lâwmthu an sawi a. Beiseina sang tak nen an hmalakna ngun takin an thlir reng dawn tih nimina thuchhuah an siamah an sawi bawk.
