Mizo Zirlai Pawl (MZP) General Headquarters, Aizawl chuan vawiin October ni 27, 2023 chhun dar 12 khan MZP Conference Hall-ah Zirlaite Ni leh MZP din champhaphak vawi 88-na lawmna leh zirlai hruaitu pass thar te lawmpuina hun a hmang a. He hun hi Pu Lalsangliana MCS Director, School Education Department in khuallian niin a hmanpui a. MZP Vice President Pu C.Lalremruatan hun a kaihruai a ni.
He huna thusawitu MZP President Pu H.Lalthianghlima chuan, Zirlaite Ni pual hian Zirlaite fuihna thu a sawi a, Zirlaite chu ruihtheihthil laka fihlim tur leh vawikhat tih chhin a pawi ziate a sawi a. “Zirlaite min ti chhetu tu a nih avangin tih chhin loh a him ber a ni” a ti.
MZP President chuan, Scholarship 2nd installment tun thlenga sem a la nilo chu a vei thu a sawi a. Zirlaiten an chanvo Scholarship an dawn vat theih nan a enzui reng a, ni 3 November, 2023 hma ngeia zirlaite account-ah a lut lo a nih chuan na takin nawr a ni ang a ti.
Khualian School Education Director Pu Lalsangliana chuan thusawiin, Zirlaite Ni pualin zirlai zawng zawngte duhsakna a hlan a. “Zirna ṭha kan tih hi, zirna in (Institution)-ah chauh a innghat lova. Zirlaiteah thui tak a innghat a ni” a ti a. Hlawhtlinna hi zirtute-ah a innghat thui avangin, Zirlaite hlawtling tura bei nasa turin a fuih a ni.
He hunah hian zirlai hruaitu pass thar mi 68 te lawmpuina hlan an ni a, heng zingah hian MZP General Headquarters Executive Committee Member, Hnampual Zirlai Pawl hruaitu, MZU Student Council, Students’ Bar Council leh College Students’ Union Leaders te an tel a ni.
MZP hi kum 1935 October ni 27 khan mizo lehkhathiam hmasa ten an din a ni a, a tirah Lusai Student Association tih niin, Kum 1947 khan Mizo Zirlai Pawl tia thlak a ni. MZP President hmasa ber chu Pu R. Buchhawna a ni a, MZP General Headquarters hnuaiah hian Headquarters-13, Sub-Headquarters- 49 leh Branch 100 chuang a awm mek a. Hnampual Zirlai Pawl- 7 leh Zirna in (institution)- 25 an in ziak lut mek a ni.
