MZP chuan thuchhuah siamin, “Bangladesh-a cheng Zohnahthlak kan unauten, Bangladesh Army leh Arakan Army (AA) te vanga harsatna nasa tak an tawk mek hi pawi a ti hle a, nekchepna leh rikrapna tuar mek kan unaute hi kan lainat takzet a ni.
“Bangladesh sorkarin Bangladesh chhunga cheng ve tho, Takam leh Rohingya-te tan harsatna ansiam sak loh lai leh Bangladesh helpawl an thurualpui theih lai a. Zohnahthlakte hnawk ti a, an chungah Bangladesh atanga hnawhchhuahna, nghaisakna leh nekchepna, an thlen bik hi MZP chuan mak kan tiin a mawhphurtu Bangladesh sorkar a dem hle a, thinurthlak kan ti takzet a ni. He thil thleng chungchangah hian Mizoram sorkar pawh a tul anga hma la ve nghal tur leh kan unaute harsatna chungchang hi enzui thuai turin kan ngen nghal a ni,” an ti.
Hemi chungchangah hian vawiin chhun khan MZP hruaitute leh Mizoram Bawm Students Association (MBSA) hruaitute chuan Dr. R. Lalthangliana, Health Minister chu a pisa ah an hmu a. MZP leh MBSA hruaitute chuan Bangladesh sorkarin zohnahthlak kan unaute Bangladesh atanga a hnawhchhuah vanga lungawi lohna leh Mizoram chhunga raltlan mi 271 te enzui tura an duh thu an thlen a. Health minister chuan a lo enzui tur thu leh hma a lo lak nghal tur thu a lo sawi a ni.
