Mizo Students’ Union (MSU) General Headquarters, Aizawl chuan vawiin ni 6 July, 2023-a Mizoram University hnuaia Under Graduate (UG) result tluang taka Mizoram University Examination Department-in an ti chhuak thei chu lawmawm a ti a, Mizo zirlai hlawhtlinna chang zawng zawngte thinlung takin a lawmpui a, hlawhtlinna chang zo lote pawh beidawng lova ṭan la thar zawk turin MSU chuan zirlaite a chah bawk a ni.
MZU buatsaih Bachelor Degree exam 2023-ah hian Bachelor of Arts-ah zirlai exam zawng zawng 5329 niin zirlai 4092 an pass a, pass percentage hi 76.79 a ni. Bachelor of Science-ah exam zawng zawng 605 niin zirlai 489 an pass a, pass percentage hi 80.83 a ni. Bachelor of Commerce-ah exam zawng zawng 401 niin zirlai 364 an pass a, pass percentage hi 90.77 a ni. Bachelor of Science (Home Science)-ah exam zawng zawng zirlai 36 niin zirlai 24 an pass a, pass percentage hi 66.67 a ni bawk. Tin, MSU chuan stream hrang hranga 100% pass nei thei, Arts Stream-ah Aizawl City College leh Faith College te, Commerce Stream-ah Govt. Champhai College, Higher & Technical Institute, Mizoram, leh St. Xavier’s College te lawmpuina leh duhsakna ṭha ber a hlan bawk a ni.
MSU General Headquarters, Aizawl chuan kum tin a lo tih ṭhin angin Under Graduate exam-a subject tina Mizo Topper-te leh College Students’ Union hruaitu pass zawng zawngte chu ni 20 July, 2023 hian Vanapa Hall-ah lawmpuina hun a hmang leh dawn a, College zirtirtute leh zirlaite he huna tel ngei turin a sawm a ni.
