Vawiin khan NABARD loan hmanga Thingfala Primary School-III leh Middle School siamthatte chu MPYCC leh Lunglei Congress Thalai (LDYCC) ten an en a, thudawn danin thil felhlel a tam hle a nia sawi a ni.
Thingfal Primary School-III hi a sakna atan cheng nuai 10 estimate niin thudawn a ni a. Tukverh leh kawngkharte thlak vek tur a nih bakah Ceiling siam tur a ni bawk. Thingfal Primary School-III hi Ceiling pakhat mah siam a ni lo a, kawngkhar leh tukverhte thlak a ni lo a, distemper hmanga rawng hnawih chauh a ni.
Thudawnna atanga a lan dan chuan cheng nuai 10 estimate atang hian cheng nuai 6 chauh an dawng a, hei hi cheng nuai thum dawnin an hralh chhawng leha a thawktu pawhin hlawk an la ti hle.
Thingfal Middle School pawh hi cheng nuai 10 estimate a ni a, Ceiling leh kawngka te thlak vek tura tih a ni a. Ceiling hi an siam lo a, kawngkhar leh tukverh thlak a ni lo bawk. Rangva thar tlem azawng an vuah thara rawng an hnawih bawk.
“Hetianga NABARD loan a pung nena rulh leh tur nasa taka khawih chingpen a ni hi pawi kan ti takzet a ni. “Mizoram sorkar hian a mawhphurtu hi zawng chhuakin hrem rawh se.
“SEDP sum hmanga zirtirtu lak turah MNF Block leh Unit ten zirtirtu lakna tur advertisement an chhuah ta mai te hi kalphung lo hle a. MNF Block leh unit te hi kan tu leh fate zirtirtu la turin kan ring zo lo a. Kan tu leh fate tan chuan party induhsakna avang ni lo va, thiamna ngaih pawimawh zawk tur a ni,” tiin thuchhuah an siam zui a ni.
