National Highway siam mek ah khawhtlirna hmun 26 siam dawn

Aizawl, 15 May 2022: Governor Hari Babu Kambhampati chuan Tourism Minister Robert Romawia Royte leh Tourism Official te bakah NHIDCL hotute an hmalak mekna leh an dinhmun te sawipuina hun neiin, Mizoram chhunga Tourism department in hma a lak mek te, hmachhawp te, State Tourism project proposal hrang hrang Central Sawrkar hnena thehluh tawh leh a thlen chin te leh hmalak chhunzawm dantur te sawiho a ni a. Governor hoa inkawmna ah hian sawrkar laipuiin Mizoram chhunga NHIDCL te hnathawhtur a pek te sawiho niin project chhungah khung belh tha nia hriatte sawiho a ni bawk.
Governor Hari Babu Kambhampati chuan Tourism department hmalakna hrang hrang a kalpui mek te, central sawrkara project a thehluhte leh hmathar lak an tumna te hriat chian a duh tih a sawi a. Mizorama Tourism Sector tih hmasawn chungchangah Pu G.Kishan Reddy, Union Minister of Tourism a hmu tawh tih sawiin a inhawng hle nia a hriat thu a sawi a.
Governor chuan Tourism Ministry lam hian Mizoram chhungah Khawthlirna(View Point) 26 NHIDCL an siam tir tur chungchangte pawh an hrilh thu sawiin he view point awmnaah te hian Dhaba/Dawrte te, Toilet/Zun leh ek thiarna/ Parking te dah tha nia a hriat thu te sawiin Tourism Department leh NHIDCL te chu hemi chungchangah hian inpawh takin thawkho thei se a duh tih a sawi a. Reiek Tlang chu a lar tawhin tlawhpawh tu a ngah tawh a; a tlawhtute tawmhulna leh zun leh ek thiarna pawh Ramngaw tichhe miah lova siam theih dawn te a awm chuan dap a hun tawh a. Kan Tourist site hrang hrangah pawnlam atanga khualzin rawn tlawhtute mamawh pawimawhte kan enchian deuh tha nia a hriat thu te pawh a sawi a ni.
Tourism Minister Robert Romawia Royte chuan Tourism department chu thawk tu tlemte leh Dpet la nuapang tak mah nise Tourism chuan theih tawp chhuahin hna tam tak a thawk a. Guidelines, Rules & Regulation leh Tourism kalpui tura tih tul hmasa te siam fel deuh vek tawh a ni a ti. India ramah hmahruaitu niin Responsible Tourism Policy 2020 siam a ni tawh a; ram leilung leh ramngaw te ti chhe lo thei ang ber tur leh khualzinmite hipna hmun an buatsaihna hmuna chengte eizawnna tur thlenga ruahmanna siam a ni a ti. Minister chuan Tourism chi hrang hrang 15 Mizoramah kalpui theih nia a hriat thu leh heng zingah hian Eco-Adventure, Nature Based leh Culture Tourism huangah te Mizoramin hlawhtlin theihna a nei tha leh zual tih a sawi a. Kum 2019-2020 khan Lengpui Arport leh ILP Checking point hrang hranga a chhinchhiahna mumal tak an siam atanga a lan dan chuan khualzin 1.60 lakh( 14% of State Population) an rawn lut a, heng zinga 80% chu rawn zin khawthawng( sight Seeing) an nia, 10% chu sumdawnna leh hna kaihhnawih thila rawn zin leh a bak chu adventure neih duh avanga rawn zin leh sakhaw thila rawn zin te an ni tih a sawi bawk.
He meeting-ah hian Jt Secretary leh CEO Mizoram State Tourism Authority V.Lalengmawia chuan Tourism Department enkawl thin khualzin thlenna leh hmunhma 69 zinga 27 chu mimal sumdawngte an enkawl tir tawh a. Tunhmaa Tourism Department hnuaia awm ngai lo Hotel, Restaurant, Tour operator, homestay, travel agent, fair leh festival te chu Tourism Department thuneihna hnuaiah dah a ni tawh thu a tarlang a ni.
Sawrkar khualbuk sawrkarin a enkawl 42 leh sawrkar khualbuk mimal ten an enkawl 27 a awm a, Hotel 72 awm mekin room 608 hengah te hian a awm a. Private Homestay 13, sawrkarin a tanpuina hnuaia Homestay kalpui mek 77, Tour operator 8, Travel Agent 41 leh Tour Guide 89 te Mizorama khualzin lo kal te lo dawngsawng turin a awm mek a ni.