Hotel Hyatt, Gachibowli, Hyderabad-a ni hnih awh tur National Mines Ministers’ Conference, Pralhah Joshi, Union Minister of Parliamentary Affairs, Coal & Mines, hova neih mekah Mizoram atanga tel Commerce & Industries Minister Dr R. Lalthangliana chuan Inrinni khan thu a sawi. Conference in a tum ber chu Central Government leh State Government ten mineral zawnchhuah, hlawk leh him zawka laihchhuah kawnga thawh hona țha zawk neih leh kum 25 lo la awm turah Mineral Sector-a India hi Developed Nation a hlan kai a ni. A ni 1-na nimin khan Ministry of Mines subject thlur bik niin, a ni 2-na vawiin hian Ministry Coal subject thlurbing a ni.
Dr. R. Lalthangliana chuan thu a sawiah hian Mizoramah Regional Coal Exploration nei tura hmalak mek a nih thu a tarlang a. Coal India Ltd. Ministry of Coal hnuaia Central Mine Planning & Design Institute Ltd (CMPDIL) leh Mizoram Sorkar hnuaia Directorate of Geology & Mining te chuan kum 2018 khan khan thawhhona thu thlungin an thawk dun țan tih sawiin lungalhthei hi hmun/Block hnih a zawn tura ruahman a ni a ti a. Block khatna chu Thinghlun/Lushaicherra, Mamit District ah 33 sq. km a zauva zawn tur niin, a pahnihna chu West Rotlang, Lunglei District ah 48 sq.km a zauva zawn tur a nih tur thu a sawi a ni.
Dr Thangtea chuan tun dinhmunah Directorate of Geology & Mining (DGM) hian Draft Tender Document siam tawhin CMPDIL-ah kumin May thla khan a thehlut tawh a. Hei hi annin lo endik tawhin vetted comment an lo pek angin siamrem ngaite siamrem a nih hnuah Notice Inviting Tender (NIT) tihchhuah a ni ang, a ti a. Lungalhthei zawn hi Company te tihtur niin a sum sen ngai tur zawng zawng 100% hi Central Government tum tur a ni tih a sawi a, Mizorama lungalhthei zawnna turah hian Directorate of Geology & Mining, Commerce & Industries Deptt. chu Nodal Department niin logistic support ngai zawng zawng an buaipui ang.
Mizoram chhunga Oil & Gas zawn hna pawh ONGC, Oil India (OIL) leh Vedanta Ltd. ten a thawh mek thu leh hemi chungchanga chak zawka hna thawh a nih theih nan Commerce & Industries Department, GoM chuan June ni 22, 2022 khan Joint Meeting nei tawh tih Minister hian a sawi a, he hunah hian Directorate General of Hydrocarbons (DGH) under Ministry of Petroleum & Natural Gas (MoPNG), ONGC leh Oil India Ltd (OIL) bakah Directorate of Geology & Mining Official an tel thu a sawilang bawk. Hei bakah Oil & Gas zawn kawnga chak zawka hma lak a nih theih nan leh oil & gas la zawn lohte Block hran siama Global Tender chhuah a nih theihna turin March ni 25, 2022 khan Directorate of Geology & Mining Director Pu Lalțhazuala leh Deputy Controller of Mines te chu Directorate General of Hydrocarbons (DGH) Office, Noida (UP) a an kal thu a sawi bawk.
