Vawiin Dt 26.9.2023, Thawhlehni hian YMA Jubilee Run, Tuikual South-ah MNF Tuikual South Unit II huaihawtin mithar lawmluhna leh intuaitharna hun hman a ni. He hun hi Pu Lalruatkima bialtu MLA leh MNF Adviser chuan a hmanpui a. Pu Lalruatkima hian Congress, ZPM leh neutral aṭangin MNF zawm thar voter 91 a lawmlut nghal a ni.
Pu Lalruatkima chuan thusawiin, “Kum 10 chhung Aizawl West II bialtu MLA ka lo ni ve dawn ta reng mai. Pathian ropui zia leh miten min hmangaih zia ka hmu a, lawmthu sawi nan an tan ka theihna zawng zawng hlan turin rilru ka pu a ni. Chutiang tak chuan ka theihna chinah hna ka thawk ve pawhin ka hria. In mi ṭawiawm tawhna zawng zawngah lawmthu ka sawi a. Bial tan khawtlang nen ṭangrualin theih tawp kan chhuah ho zel ang a. Hmasawnna hna pawh kan thawk nasa thawkhat a, chutih laiin thawh zel tur erawh a la awm nual. Kan hma lam hun zel turah pawh bialtu mipui zawng zawngte ṭawiawmna ka dil a ni,” a ti.
Bialtu MLA chuan, “Pathianin MNF Party hi min hruai a, kum 2 chhung hna thawk hleithei lova kan awm chhungin hmasawnna hna ram pum huap pawhin kan thawk nasa hle a ni. Kha hripuiah khan meialh en a, chhunchham awm lovin kan paltlang thei a, he hnam tana Pathian thiltih mak hi a ropui hle a ni,” a ti a. “Assam nen ramriah kan buai a, silai a puak hial a nih kha. Assam lakah kan tlawm lova, ramriah nasa takin hma kan sawn ta zawk a ni,” a ti.
Pu Ruatkima chuan, “Kan hma maiah kan inthlang dawn a, Kan Pathian hian min hruai zel a, kan sorkar leh ang, tih hi ka ring hmak a ni. Party pahnihte an Leader-ah an buai ve ve a, duh lotu an tam hle. Chutih laiin keini chu Pu Zoramthanga hruaina hnuaiah lungrual takin nationalism meichher chhi chungin hmalam kan pan mek a ni. He hnam hian engtik niah emaw chuan zalenna famkim kan la nei dawn, ṭhangthar zelah chu chu kan tuh a ngai a ni,” a ti.
Pu Ruatkima chuan, “ZPM-te han thlir ila, Candidate an thlak an thlak a, dam ṭhat loh pawh ngam awm loh khawpin an inthlak nasa a. An leader-ah an buai a. An chhungkua an buai em em a, thil theih loh, duhthusam mai an zuar nasa em em a. Mipui an harh mek a ni. Ballon hampuar, a rei deuh hnua thep vuai chun ang mai hi ZPM dinhmun chu a ni. A tirah chuan an mar ṭha viau a, tunah chuan a thep nasa ta mai a, a thep belh mek zel bawk a ni,” a ti bawk.
MNF adviser chuan, “Kan hotute hi ram leh hnam tana nunna hlana thi ngam an ni a. Mahni hnam tana thih ngam lupua zalenna sual tawhte hi khawvelin an dah hniam ngai lo a, an ngai sang em em a ni. Sorkar dang leh sorkar laipui dawr kawngah pawh zah a kai em em a ni. Kan ram, kan hnam leh sakhua a him hi MNF dinchhan leh thil tum bulpui ber a ni a, a ni zel ang,” a ti bawk.
He Programme hi Pu JS. Lianhnuna, President, MNF Unit II President-in a kaihruai a ni.
