Vawiin khan Mathew Antony, National Spokesperson & AICC incharge- North East chuan Aizawl Press Club-ah chanchinthar lakhawmtute kawmin, “Congress party chuan January 13 khan Chhattisgarh a Raipur session neihnaah Centre a thuneihna chan a nih chuan Minimum Support Price (MSP) legal guarantee pek an tum thu a puang a. MSP hi loneitu tena hun rei tak ata tawh an ngiat niin MSP chu 2024 General Election neih zawha office luah hunah INDIA government ngaih pawimawh ber a ni ang,” a ti.
Mathew Antony chuan, “Kum 2014 a Bharatiya Janata Party leh Prime Minister Modi tena thutiam an neih nawn awn awn te chu an rauhsan a ni. PM Modi ngeiin 2014 General ELection dawna BJP Prime Ministerial candidtae nia a thutiamah MSP chu Swaminathan, tun hnai lawka BJP te ngeiin chawimawina Bharat Ratna an pek rawtna angin an pek tur thu a sawi a ni. BJP te hian Swaminathan rawtna siam ang chuan pe se la an chawimawi ropui zual ang.
“Swaminathan rawtna ang chuan MSP chu total input cost bakah 50 per cent tur a ni a. Vanduaithlak takin BJP leh Modi te chuan an tihthin dan anga an thutiam te kalsanin Supreme Court of India hnenah affidavit siamin ‘actual input cost plus 50 extra’ a MSP pek ngaihna a awm lo an ti a ni.
“Kum hnih kalta khan loenitute chuan Delhi daifemah lungawilohna kum khat vel lawih an lantir hnuah Prime Minister chuan MSP legal guarantee chu ngaihtuah a intiam a ni. Kum hnih a ral tawha engmah thleng a la awm lo. Loneitute chuan Modi leh a thutiam te chu hrilhhriat nawn leh tumin national capital an pan mek a ni. Mahse, national capital an luh remtihsak lovin danin an awm mek a ni,” a ti bawk.
Kum sawm chhung rorelna dik loah kan awm nia sawiin Mathew Antony chuan, “Narendra Modi an kum 2014 General Election hma khan India mipui te thutiam hlentheihloh a tiam a ni. A thusawi te rilruah a la cham reng a, a thusawi te erawh Prime Minister a nih hnuah a theihnghilh vek thung.
“Modi chuan foreign bank a black money dahah Congress te puhin chung te chu ka la let vek ang a ti a, Indians tin te bank account ah Rs 15 lakh theuhin ka dahsak ang a ti a. Chumai chu a ni lo, thuneihna a chan hnuah Indian tin te chu ‘Zero-Balance’ bank account nei vek tura tiin reilote hnuah Rs 15 lakh an dawn tur thu a hirlh bawk. Kum sawm a raltaa eng ‘bank transfer’ mah a la awm lo.
“Modi an kum tinin hna vaibelchhe hnih ka siam ang a ti a. A sawi atanga chhiar chuan vaibelchhe sawm hnih hna thalaite hnenah a pe tawh tihna a ni. Mahse, chung chu a thleng si lo, India rama unemployment rate chu kum 45 chuhnga a san ber lai kan tawng mek a ni. Modi sorkar ngei central sorkar department, corporations/PSUs ah ringawt pawh hna ruak 30 lakh a awm a ni.
“Modi ngeiin kum 2022 a nih meuh chuan Loneitute sum lakluh chu a let hniha tihpun a tiam kha a nia. Kum sawm a ral tawh a, loneitute sum lakluuh chu inflation sang leh input cost hrang hrang vang te in a tlahniam char char zawk a. Sorkar dang hunlai aiin Modi sorkar ah loneitu intihlum an tam fe zawk bawk.
“Thil man a sang zual zel a. Gas cylineder man chu a let hnihin a pung tawh a. Diesel leh petrol man te chu international market a crude oil man a tlahniam chungin a let hnihin a to tawh bawk.
“BJP sorkar chuan sipai atana inlak dan tha tak system awm reng chu hnawlin Agnipath scheme a kalpui a. Kan defence forces leh India defence chu ‘contract labourers’ hnuaiah a dah tihna a ni. Agnipath scheme hi contract basis a sipaia mi kum li tantir ang a ni mai. India security tan a tha lo va, chumai bakah thalai te career tichhetu ni dawnin kum li hnuah hna an nei lo mai dawn a ni.
“Modi sorkar hnuaiah India ram leiba a let thumin a pung tawh a. Kum 2014 a India leiba neih Rs 55 lakh crore chu tunah chuan Rs 185 lakh crores a ni tawh.
“Mahse heng zawng zawng hi hun reilote hnuah a liam mai dawn a. Kum sawm chhung rorelna dik lo chu a liam dawn tawh a ni,” a ti bawk.
