Rotary Club of Pen Orion Pune Mahasrasthra hmalakna in Rotary International District 3131-a Rotary Club 16 atangin Rotarians 57 chuan Northeast Car rally an nei a. February 17, 2024 ah Siliguri atanga tanin, February 27 tlai dar 6.00 khan car 16-ah Rotarians 55 chuan Aizawl an lo thleng .
Rotary Club of Aizawl president leh a thawhpuiten Aijal Club-ah lo lawmin, hnam lam Cheraw an entir a, anmahni lam atangin group zai leh a huhova lam an huaihawt. Rotary exchange programme-a neih thin Club flag exchange pawh neih a ni.
An team leader, Rotarian Subhosh Joshi chuan hetiang car rally hi vawi sarih an huaihawtna a ni a. Northeast-a a vawikhatna ni. Rotary Club tih larna bakah Rotary ‘areas of focus’ pasarih zinga pakhat – ‘Remna leh innghirnghona tih reh’ na hmanrua a nih bakah ram chhung mite inpawh loh lutuk avanga innel lohna chu NE Car rally hian sukiang se an duh tih a sawi.
An tum leh tur chu, Manipur Moreh atanga tanin, Thailand thlenga South Asia Ram paruk tlawh tur Car Rally neih a ni tih a sawi bawk.
Rotary hi khawvel pumah service organization lian ber leh hmasa ber niin, tunah hian member maktaduai 12 aia tam an awm a. Aizawlah chuan June 30, 1992 khan ding tanin, tunah hian member 31 an awm.
Project hrang hrang an nei thin a. Chhunkaw 10 tana Serkhana in sak sak, artificial limb camp huaihawt, free cataract surgery camp neih, bus waiting shed siam, vantlang inthiarna sak, hospital tihchantlun nana tanpuina pek leh sawrkar school-a kut silna – washing station leh tui thianghlim inna dahsak, health camp leh dan lam inhrilhhriatna seminar huaihawt te chu an thil tih tawh zinga thenkhat a ni.
Tuna an project lian deuh zingah Central Jail Aizawla hmeichhe jail tang (convict) te puanthui zirtir, naupang mit thalo tarmit pek, thalaite fuih tur leh tiphur tura mi hlawtling leh ngaihsan awm college zirlaite hmaa thu sawi tura hmalak te a tel.
Car rally-a Aizawl rawn tlawhtute hi February 28 zing khan Tripura pan turin an chhuak leh nghal a. Adviser to CM H Ginzalal-a’n a vailiam a ni.
