NEC Plenary vawi 70 na, Guwahati a neihah Pathianni khan Chief Minister Zoramthanga pawh telin, hmasawnna atana Mizoram mamawh hrang hrang a sawi. He meeting hi Union Home Minister Amit Shah chuan a kaihruai a. Ni hnih chhung (8th – 9th October, 2022) neih a ni.
He intawhkhawmah hian Chief Minister Zoramthanga chuan Mizoramin state nihna dinhmun kum 35 kaltaa a neih atanga vawiin thlengin kawng hrang hranga hmasawnna hmuh tur a awm thu a sawi a. COVID-19 hrilengin state economy a nghawngna laka ngai awh turin leh nasa zawka hmasawn turin sawrkar laipui puihna mamawh a nih thu a sawi a. Hmasawnna atana pawimawh tak pakhat chu inkalpawhna a nih thu te, sawrkar laipuiin PM-DevINE kaltlanga Mizoram tan cheng vbc 600 dah a ni chu lawmawm a tih thu te a sawi a. India hmarchhak state te tan PMGSY I&II hna thawh chhunzawm a nih theih nan March 2023 thleng funding pek ni se tiin a thlen a.
Chief Minister chuan kuthnathawktute sum lakluh a lo tam zawk theih nana hmalakna pakhat atan thei, thlai leh pangpar – chhe hma chi phurhna (transport) man to lutuk chu tihtlawm a nih theih nan subsidy pekna tur fund siam ni se tiin rawtna a thlen bawk a. Heng bakah hian Special Assistance to States for Capital Investment chu kum thar la awm turah pawh chhunzawm zel turin a ngen bawk.
North East state ten 10% Gross Budgetary Support chu central scheme pangngai te bakah an hman tangkai theih dan tur kalphung fiah felfai tak siam turin Ministry of DoNER chu Chief Minister chuan a ngen bawk a. Externally Aided Projects (EAP) te pawh awlsam zawka clearance hmuh a nih theih nan single window approach hman ni se tiin a rawt a. Tourism chungchang sawi lang bawkin, North East pum tan common tourism circuit neih theih ni se tiin, ramria khua te economy chawisan nan border tourism vawrh lar tha a tih thu a sawi bawk a, air connectivity tihhmasawn a pawimawh thu a sawi bawk.
Heng bakah hian Chief Minister chuan Mizoram a lui hrang hrangte humhalh a nih theih nana ruahmanna siam te tarlangin, DoNER Ministry leh NEC tawiawmna a ngen nghal a. State tin hmasawnna atan an mamawh dik tak hriat chian a, an dinhmum a zira tanpuina pawh pek a pawimawhzia leh enzui a tulzia a sawi a. Ramri hrula awm te tan a bik takin ruihhlo zawrh leh tawlhin nunna leh economy a tihchhiat dan sawilang bawkin, thawhhona tha tak neih zel a pawimawh thu a sawi.
NEC Plenary vawi 70 na ni hmasa zawkah hian India hmarchhak state hrang hrang official te telin, DoNER Minister G. Kishan Reddy chuan a kaihruai a. A ni hnihna ah hian Chief Minister te an tel a ni.
