Tukin khan K.Moses Chalai, IAS, Secretary, North Eastern Council chuan Godrej Agrovet Ltd. Palm Oil Factory, Bukvannei a thlawh a. John LT Sanga, Deputy Commissioner leh Ngurrinsanga Sailo, District Agriculture Officer-ten tawiawmin Lalruatkima, Executive – Extension Officer, Godrej Agrovet Ltd. chuan Palm Oil Factory-a hna thawhna kalpui dan tarlanna hun a hmang bawk a ni.
K.Moses Chalai, IAS, Secretary, NEC chuan Sawrkar hmalakna kalpui kawngah Mizoram chu hmarchhak state dangte nen khaikhin chuan a titha pawl an nih a rin thu a sawi a, mizo thalaite leh tunlai thiamna hmuhchhuah thar ang angte chu hmasawnna hna thawhna kawngah hman tangkai thiam a pawimawh thu a sawi.
Kolasib district chhunga Oil palm rah thar chhuah atanga za zela 20 bawr vel chu inkalpawhna harsat avangin Palm oil factory a thlen thin loh thu thawktuten an tarlan angin, NEC Secretary chuan DC Office, Kolasib leh Godrej Agrovet Ltd. Palm Oil Factory-te tangkawp a mumal tak a zirchianna kalpui turin leh chung harsatna sutkian a nih theih nan ruahmanna felfai tak siam turin a chah. State thenkhatah chuan Oil palm herna fe chu sangha leh ran chaw siam nana hmanraw tangkai tak a nih thu K.Moses Chalai chuan sawiin Palm Oil Factory pawh chuan chutiang tur a ruahmanna siam turin a chah bawk a ni.
Lalruatkima, Executive-Extension Officer, Godrej Agrovet Ltd. tarlan danin October ni 28, 2014-a hawn Palm Oil Factory, Bukvanneiah hian Oil Palm chingtu mi 600 bawr velin 1,300 Hectare a zau Oil Plam chinna hmun an enkawl a. Kum 2021-22 chhung khan Oil Plam rah kg khat Cheng 5.50 a leiin Kolasib district-ah Metric Ton 1600 an lei thu a sawi a, April 2022 atang khan an leina man hi tisangin kg khat ah cheng 10 a nih tawh thu a sawi.
