Mizoram First inti pawlte chuan vawiin khan New Market building sak chungchangah thuchhuah siamin, “Aizawl New Market (Sabzi Bazar kan tih ve tho) building chu sak that tura vuak thiah vek niin, a thar sak hna chu kum 2019 atang khan tan tawh a ni a. A satu tura thlan pawh Lushai Engineers an ni.
“Building pakhat sak lai mek hi a plinth/foundation buaipui mek lai chu MIZORAM FIRST team ten ni 8/7/2023 (Inrinni) khan kan thlawh a, kan tlawh lai tak hian a foundation plinth-beam an lo chhung mek a. An chhun lai chu tui tam tawkin a chim mek a, chuti chung chuan a thawktute chuan cement chawh sa chu tui tlingah chuan an chhung mawlh mawlh mai a, mak kan ti hle. Video-a kan record chu social media-ah pawh a lang nual tawh a ni. He video darh avang nge ni, he beam chhun hi vuak chhiat leh a ni tih thawm a rawn awm leh a. Mahse, MIZORAM FIRST team, a hmuna en tute chuan a chung lampang leh eng emaw chin chauh vuak chhiat a ni tih kan hmu a ni.
“Heta an cement hman hi a char hma chi (quick setting) a ni bawk si lo va, building foundation atana hetianga chhun anih chuan building a tiderthawng dawn a ni tih chu thil chiang sa a ni. Hetiang hian mualpho lo ta se tun ang hian an kal pui zel dawn tihna a ni em? He lai an khawih hmaa an lo zawh tawhte pawh a ngaihthatthlak ta lo hle a ni.
“New Market Building hi khawpui hmun laili taka awm, mipui tam tak chet tlatna tur a nih avang leh lirnghinna ram (seismic zone 5) a awm kan nih bawk avangin he hnathawh duhdah taka kalpui hi mipui himna ngaih pawihmawh lohna ah keini MIZORAM FIRST te chuan kan ngai a. Kan ram ro hlu tur heti mai maia duhdaha thawh hi kan pawm thei lo a, a thawktute kan dem rualin, sorkar pawhin enfiaha hma la turin kan beisei a ni,” tiin an tarlang a ni.
“He Building sak hna hi October 2019 atanga tan niin October 2021-a zawh tura ruahman leh agreement siam a ni a. Tun thleng hna zawh a la ni lo leh, tuna an thawh dan ang chuan hun rei tak la ngai tur anga a lang hi hmanrua (khawl) a tlemin hnathawktute pawh an beitham hle niin a lang MIZORAM FIRST chuan pawi a ti a. Chhungkaw 2000 chuang eizawnna tihkhaihlak a ni hi pawi a ti takzet a ni. Heti taka hna tih khawtlai a ni hi a enkawltu Department (Nodal Department) tepawhin an vil tha lo niin MIZORAM FIRST chuan kan ngai a, kan dem a ni.
“MIZORAM FIRST chuan Mizoram tana hna thawh reng reng, neitu thinlung pua thawk turin kan beisei a. Keimahni leh kan thlahte tana thawk kan nih hre renga ro tling leh belhchian dawla hna thawk turin Lushai Engineers te a ngen tak meuh a. Sorkar pawhin a theih anga pa chan changa mipuite tuarna tinep thei tur ber leh ram rotling siam tura hma la turin kan ngenin kan beisei tak meuh a ni,” an ti.
