Vawiin khan Mizoram chhunga Environment lama hnathawk thintu NGO pawl pangate – Centre for Environment Protection (CEP), Association for Environmental Preservation (ASEP), Green Mizoram Network (GMN), Save Environment Association (SENVA) leh Clean and Green Revolution (CGR) te chuan Joint Statement point paruk siamin, Chief Minister hnenah an thehlut a. “Hengte hi kan ram leh hnamin hmahun tha a neih theihna tur atan kan sorkarin a tih hlawhtlin ngei kan beisei tlat a. Environment tha tak nei chunga kan ramin hmasawnna tlo (sustainable development) a neih theihna turin keini Environmental NGO-te chuan theihtawp chhuahpui che kan inhuam reng bawk a ni,” an ti.
Joint Statement-ah chuan a hnuai a mi ang hian an tarlang a, an pawl president te theuhin hming an ziak hnan a ni.
1. Working Plan/Scheme:
Mizorama ramhmulte awmze nei zawka humhalh leh chhawr tangkai a nih theihna turin National Working Plan Code 2023 behchhanin territorial Forest Divisions zawng zawng tan Working Plan/Scheme hi siam vat vat ni rawh se. India rama Forest Divisions zawng zawng Working Plan/Scheme nei vek turin Supreme Court chuan a ti a, hei hi scientific management of forests neih a nih theihna tur niin, ‘approved Working Plan/Scheme’ tel lova ramngaw/ramhmul enkawl hi Supreme Court thupêk bawhchhiatna a nih avangin hmanhmawh a ngai hle a ni. Working Plan/Scheme hmanga ramngaw/ramhmul enkawl hi State sorkar tan ‘Revenue Sources’ tha tak a ni dawn bawk a ni.
Kan thenawm Assam State pawhin Forest Divisions 33 an neihah Forest Divisions 23 zetin ‘approved Working Plan’ an neih loh thu The Sentinel chanchinbuin a tarlan behchhanin Gauhati High Court chuan thubuai (PIL (Suo Moto)/3/2023) a siam a, he thubuai hi a la kal mek a ni. Keini pawhin ‘approved Working Plan’ nei tura rang taka hmalak hi hmachhawpah kan neih a ngai a ni.
2. Recorded Forest Areas (RFAs) chungchang:
Kan rama RFAs (i.e. Reserved Forests, Protected Areas, etc.) te hi nek nasat niin a lang a. Kan hriat danin 107.37 Sq. km zeta zau nek (encroached) a ni. RFAs chhûng hmun tam takah hian khua, in ding, huan hmun nghet — WRC, thei huan, etc. a tam hle a. Heng te hi survey chian a, dân anga hnawhchhuah (evict) emaw ram ‘Pass’ cancel ngai leh dân hmanga dah ngheh (regularize) theih chi thliara chinfel vat a pawimawh hle a ni.
Notified forests leh deemed forests atana comprehensive records buatsaih tura ni 14/2/2024-a din ‘Joint Verification Team’ hian hemi chinfel hna hi hma tel sela a tha a awm e. Hei hi chinfel vat a nih loh chuan ram chungchangah buaina a awm chho reng dawn a. Chinfel a nih chuan RFAs chhûnga ram pass lo pek palh pawh a awm tawh dawn lo a ni. Tin, RFAs ramri chinfelna hian Working Plan/Scheme atan thlengin awmzia a nei dawn bawk a ni.
3. Payment for Ecosystem Services (PES):
CAMPA fund hi Compensatory Afforestation Fund Act, 2016 leh Compensatory Afforestation Fund Rules, 2018 behchhana hman thin a ni a. Heng dân hmang hian APO siam thin a ni. Section 6 (a), CAF Act, 2016 angin mandatory activities atan – compensatory afforestation, catchment area treatment plan leh dwarf plantation te hi dah thin a ni a. Rule 5 (2) & (3), CAF Rules, 2018 angin net present value (npv) 80% fund dah thin a ni bawk a ni. He 80% fund hmanna turah hian PES scheme ang chi hi kalpui a tha hle a ni.
Khawtin deuhthawin ramngaw humhalh tha tak tak an nei a, heng te hi awmze nei zawka humhalh leh hman tangkai a nih theih nan terms of reference (ToR) nen scientific management of forest hi kalpui ni sela, forest department-in technical inputs lam tumin khawtlâng theuhin a enkawl hna tum sela, tichuan mipui nena thawhhona huang zau zawkin hawn a ni anga, hei hi forest department hmalâkna chhuanawm tak a ni thei dawn a ni. Tunah hi chuan a hming deuh chauha kalpui a nih avangin awmzia a nei thui rih lo hle.
4. Forest Development Corporation:
Mizoram State Forest Development Corporation (MSFDC) hi din ve ngei ni se a tha a. Hei hi ram leilung pianken hausakna kan neih te mumal zawka kan chhawr tangkai theihna tur atan a tul em em a ni. MSFDC din hian sum sen ngai vak lova tih theih niin a lang a. MSFDC hmang hian State-in sum a hailuh theih dawn bakah ‘ecopreneurs’ leh kuthnathawk tam tak tak eizawn huang zauh theih a ni dawn a ni.
MSFDC hian heng a hnuaia tarlan te bakah thildang pawh hmalakna atanah a hmang thei anga.
a) Wood-based Industries nena thawhho
b) Non-Timber Forest Products (NTFPs) management
c) Eco-tourism
d) Plantations of economically valuable species
e) Conservation-based livelihood projects
5. The Mizoram (Forest) Act, 1955 siamthat:
He dân siamthatna tura hmalak mekna hi chak zawka kalpui ni sela. Mizoram (Forest) Rules pawh tha taka duan nghal a pawimawh a ni. Kan rama ram leilung pianken hausakna (natural resources) enkawlna dân siam dawnin a duangtu turte pawh Mizo hnam tih dan phung leh hnam dân (customary practices & laws) hre tak ni ngei sela. Kan customary practices & laws mila dân duan hi awmze neia ram leilung pianken hausakna enkawl kawngah a pawimawh em em a ni. Tin, he dân siamthat kawngah hian ‘pre-legislative consultation’ a awm ngei kan beisei bawk a ni.
6. Bawlhhlawh enkawl leh sawngbawl chungchang:
Bawlhhlawh enkawl leh sawngbawl chungchangah dân kan hmang mek kenkawh kawngah nasa zawka ‘awareness campaign’ neih leh dân kengkawhtute pawhin dânin tih tur a tih dân anga tih kawngah chak zawkin hma la sela. Aizawl khawpui bikah chuan Aizawl Municipal Corporation Solid Waste Management Bye-Laws, 2019 leh Aizawl Municipal Corporation Plastic Waste Management Bye-Laws, 2019 te hi khauh zawkin AMC hian kengkawh rawh se. Tin, Aizawl khawpui pawn lamah chuan dân awm sa — Solid Waste Management Rules, 2016 leh Plastic Waste Management Rules, 2016 te hi khauh taka kenkawh ni sela. Pollution free environment neih hi khualehtuite ‘fundamental rights’ a nihna vawnghim turin sorkarin chak zawkin hma la rawh se.
