Vawiin chhunlai khan Ngopa ah Damdawiin bul chu nasa takin a min a, In pahnih hnawlin kawng aping hneh hle a, a chhak lama damdawiin pawh khawtlangin bungrua te an thiar chhuah sak a ni.
Ngopa atanga kan thudawn danin vawiin chhun dar 12:30 vel khan Aizawl lam atanga Ngopa, Zero point thlen dawn, Ngopa damdawiin thlang lamah kawng chhak lam lei amin a, leimin hian kawng thlang lama Pu T.Samuel Zothanmawia- In Assam Type pahnih chu kawng thlang metre 50 velah ahnawl thla a. In pakhat hi an chenna a ni a, pakhat hi Furniture Workshop, khawl vel adahna a ni.
Leimin hian heng in pahnihte hi a chhilh deuh vek a. In neitute hi Leimin hlauh avangin chawlhkar hnih chhung chu zanah chuan an riak chhuak tawh a, leimin hma lawk hian In ah an awm a, leimin tur hi tlemte alo tla hmasa a, chutah chuan an tlan chhuak hman a, an him vek a, an vawk pahnih pawh leimin hian a hnawl a, mahse an him a ni.
Leimin chhak lama awm, Ngopa damdawiin PHC pawh akhi a, damdawiin ward a khum leh hmanraw dangte pawh an thiar chhuak a, tunah hian damdawiin nei lovin an awm a ni. Leiminna bula UPC Biak In pawh ruah asur zel chuan hlauhawm thei dinhmunah ading bawk.
Ruah asur reng avangin leiminin In ahnawl a, bungrua te pawh, lak chhuah theih ani lo a, zanin hian VC leh YMA ten hmalak dan tur an ruahman dawn a ni.
Leimin hian a awh thui a, kawng hi tlang mai thei chi ani lo niiin thudawnna chuan a sawi a, zin veivak motor pawh, an tang tam tawh hle. Agricuture office thlang ah By- pass road an buaipui mek a, lirthei 407 chin kaltlang theih a siam theih thuai an beisei a. Leimin hi NHIDCL kawng laih ko ani a, a hma pawhin alo min tawh thin nia sawi a ni bawk.
