State chhunga hmasawnna hnathawh avanga environment a nghawng dan thlithlai a, hmalakna enzui tur State Level Committee chu vawiin khan CM Conference Hall-ah Adviser to CM (Technical) Er (Rtd.) K. Lalsawmvela hovin an thukhawm a. NHIDCL kawng siam leh environment a nghawng dante sawiho a ni.
He meeting-ah hian NHIDCL chuan kawng an laihna leivung danna tur an siam hrang hrang te, lei a tawlh belh zel lohna tura plantation an siam te, Forest department nen tangkawpa roadside plantation an siam leh hmalakna dang hrang hrangte presentation an pe a.
Member te atangin hma an lo lakna leh an thil hmuh dan te, an ngaihdante ngaihthlak niin, hmalakna la kal zel turah mihring leh environment tan nghawng tha lo a awm zui loh nan district leh state level ah monitoring hna hi ngawrh taka kalpui zel nise tih a ni. State Level Committee hi kumin July thla khan meeting hmasa ber neih niin, tun tum hi a vawi hnihna a ni.
